تہران میں مغربی سفارتخانوں کے باہر احتجاجی مظاہرے کیے گئے ہیں

ایرانی اہلکار محمد سعید کا کہنا تھا ’ایران سمجھتا ہے کہ یورینیم کی افزودگی معطل کرنا اس کے حقوق، بین الاقوامی قوانین اور ایٹمی عدم پھیلاؤ کے معاہدے کے خلاف ہے‘۔

یہ بیان عالمی جوہری ادارے آئی اے ای اے ( IAEA ) کی ایران کے نیوکلیئر پروگرام پر ایک نئی رپورٹ کے بعد سامنے آیا ہے۔

عالمی جوہری ادارے کی رپورٹ میں کہا گیا ہے کہ ایران نے یورینیم کی افزودگی روکنے کے حوالے سے اقوام متحدہ کی طرف سے دی جانے والی اکیس جنوری کی ڈیڈ لائن کو نظر انداز کیا ہے اور تین سو سے زائد نئے سینٹری فیوجز لگا دیے ہیں۔

ایران کا کہنا ہے کہ اس کا جوہری پروگرام پرامن مقاصد کے لیے ہے اور مغربی ممالک کے ان دعوؤں میں کوئی سچائی نہیں کہ وہ جوہری ہتھیار تیار کرنے کی کوشش میں مصروف ہے۔

مزید پابندیوں پر غور  اقوام متحدہ کی سلامتی کونسل کے پانچ مستقل اراکین اور جرمنی پیر کو لندن میں ایک اجلاس کر رہے ہیں جس میں ایران پر مزید پابندیاں لگانے پر غور کیا جائے گا

ان کا کہنا تھا کہ ان عوامل کو مدِ نظر رکھتے ہوئے ان کا ملک سکیورٹی کونسل کی قرارداد نمبر 1737 کو تسلیم نہیں کرتا، جس کے تحت ایران سے مطالبہ کیا گیا ہے کہ وہ یورینیم کی افزودگی معطل کر دے۔ انہوں نے کہا ’مسئلہ حل کرنے کا بہترین طریقہ مذاکرات میں پوشیدہ ہے‘۔

ادھر جرمنی کے شہر برلن میں موجود امریکی وزیر خارجہ کونڈولیزا رائس نے بھی کہا ہے کہ امریکہ، روس، جرمنی اور یورپی یونین اس بات پر متفق ہیں کہ کسی طرح ایران کو مذاکرات کی میز پر واپس لایا جائے۔