’ایران کے فراہم کردہ بموں سے عراق میں 2004 جون سے اب تک 170 امریکی فوجی ہلاک ہوئے ہیں‘

سینئر دفاعی اہلکاروں نے بغداد میں رپورٹروں کو بتایا کہ ’ایران کی طرف سے فراہم کردہ بموں‘ کو مہلک ترین اثرات کے لیے استعمال کیا جا رہا ہے جس سے جون دو ہزار چار سے لیکر اب تک ایک سو ستر امریکی فوجی ہلاک ہوئے ہیں۔

یہ ہتھیار جنہیں ’دھماکہ خیز پروجیکٹائلز‘ کہا جا رہا ہے ایک ابرام ٹینک کو تباہ کر سکتے ہیں۔

امریکہ کا دعویٰ ہے کہ یہ بم ایران سے عراق سمگل کیے گئے ہیں لیکن ان دعووں کی آزادانہ طور پر تصدیق نہیں کی جا سکی۔

امریکی اہلکاروں نے نام ظاہر نہ کرنے کی شرط پر بتایا کہ ان ہتھیاروں نے دو ہزار چار جون سے اب تک 620 امریکی فوجیوں کو زخمی کیا ہے۔

امریکہ میں انٹیلیجنس کے تجزیہ کاروں کا خیال ہے کہ یہ بم ایران میں بنے تھے اور تہران میں سینئر اہلکاروں کے حکم پر عراق بھیجے گئے۔

ایک امریکی اہلکار نے الزام لگایا ہے کہ عراقی مزاحمت کاروں کو زیادہ سے زیادہ جدید ہتھیار فراہم کرنے کی ہدایت ایرانی قیادت کی اعلٰی ترین سطح سے جاری ہوئی ہے۔ ان کا اشارہ ایران کے القدس برگیڈ کی طرف تھا جو ’ریوولوشنری گارڈ‘ کا ایک یونٹ ہے اور براہ راست آیت اللہ خامنائی کو رپورٹ کرتا ہے۔

امریکی محکمۂ دفاع کے حکام نے صحافیوں کو وہ ہتھیار اور ان کے اجزاء دکھائے جن کےلیے ان دعوٰی تھا کہ ایران سے تعلق رکھتے ہیں۔ بتایا جاتا ہے کہ یہ معلومات عراق میں امریکیوں کی طرف سے مبینہ طور پر کئی ایرانیوں کو حراست میں لیے جانے کے بعد حاصل ہوئی ہیں۔

ایران نے ان الزامات کی تردید کی ہے۔

	یہ ’ہتھیار‘ امریکی ٹینک ابرام کو تباہ کرنے کی صلاحیت رکھتے ہیں

امریکی اہلکار نے کہا کہ بم بنانے کی ٹیکنالوجی کے علاوہ ایرانی حکومت شیعہ گروہوں کو پیسے اور فوجی ٹریننگ بھی دے رہی ہے۔

بغداد میں ہونے والی اس پریس بریفنگ میں کسی قسم کے ریکارڈنگ کے آلات اور کیمرے لے جانے پر پابندی تھی۔

پریس کانفرنس میں وہ بم اور شیل بھی دکھائے گئے جن کے متعلق امریکہ کا الزام ہے کہ وہ ایران نے بنائے ہیں۔

امریکی اہلکار نے بتایا کہ خطے میں ایران ہی وہ واحد ملک ہے جس میں اس قسم کے ہتھیار بنائے جاتے ہیں۔