اس میزائل کی مار کرنے کی صلاحیت ایرانی میزائل شہاب تھری کے برابر ہے

یہ پہلا موقع ہے کہ اس میزائل کا تجربہ رات کے اوقات میں کیا گیا۔ میزائل تل ابیب کے جنوب میں واقع ایک فوجی اڈے سے داغا گیا اور اس کا نشانہ بحیرۂ روم کے مشرقی حصے کے اوپر ایک ہوائی جہاز سے داغا جانے والا ایک اور میزائل تھا۔

اسرائیل کے وزیرِ دفاع عامر پیریز نے اس تجربے کے موقع پر کہا کہ’یہ کامیاب تجربہ بیرونی خطرات کے خلاف اسرائیل کی تیاری کا مظہر ہے‘۔

اسرائیلی میڈیا کے مطابق اس میزائل کی مار کرنے کی صلاحیت ایرانی میزائل شہاب تھری کے برابر ہے۔ اسرائیل کے پبلک ٹی وی نے اس تجربے کو’ایران کے لیے پیغام‘ قرار دیا ہے۔

مبصرین کے مطابق اسرائیل سنہ 2003 میں صدام حکومت کے خاتمے کے بعد سے ایران کو اپنا سب سے بڑا دشمن تصور کرتا ہے اور دیگر مغربی ممالک کے ساتھ اس کا بھی یہی خیال ہے کہ ایران جوہری ہتھیار تیار کرنے کی کوشش کر رہا ہے۔