’تجربے‘میں استعمال ہونے والی ٹیکنالوجی نئی نہیں ہے لیکن ا سے چین کی عسکری صلاحیت کا ثبوت ملتا ہے۔

کہا جا رہا ہے کہ چین نے زمین سے درمیانی فاصلے تک مارنے کرنے والے بیلسٹک میزائیل سے موسم کا حال بتانے والی ایک سیٹلائٹ کو تباہ کیا جسے انیس سو ننانوے میں خلا میں بھیجا گیا تھا۔ یہ ’تجربہ‘ زمین سے پانچ سو سینتیس کلومیٹر کی بلندی پر کیا گیا۔

نامہ نگاروں کے مطابق بیس سال میں یہ اپنی نوعیت کا پہلا تجربہ ہے۔ چین نے اس تجربے کی تصدیق نہیں کی۔ بیجنگ میں بی بی سی کے نامہ نگار نے بتایا کہ ’تجربے‘میں استعمال ہونے والی ٹیکنالوجی نئی نہیں ہے لیکن ا سے چین کی عسکری صلاحیت کا ثبوت ملتا ہے۔

جمعرات کو امریکی قومی سکیورٹی کونسل کے ترجمان نے ’امریکن ایوی ایشن ویک اینڈ سپیس ٹیکنالوجی‘ نامی جریدے کی ایک رپورٹ کی تصدیق کی جس میں اس ’تجربے‘ کا ذکر تھا۔

جاپان کے چیف کیبنٹ سیکریٹری نے کہا کہ ان کی حکومت نے چین سے وضاحت طلب کی ہے اور اس بات کی وضاحت مانگی ہے کہ اس کے ارادے کیا ہیں۔

انہوں نے کہا کہ اس پیش رفت پر ’ہمیں سب سے پہلے تو خلا کے پُر امن مقاصد کے لیے استعمال اور دوسرا سلامتی کے نقطۂ نظر سے تشویش ہے‘۔

آسٹریلیا کے وزیر خارجہ نے کہا کہ ان کا ملک اسلحے کی جنگ کو خلاء میں لے جانے کے خلاف ہے۔