رفیق حریری کو گزشتہ سال ایک بم دھماکے میں ہلاک کیا گیا

یہ منظوری کابینہ کے ان چھ شام حمایتی وزراء کی غیر موجودگی میں دی گئی جنہوں نے دو ہفتے قبل اپنے عہدوں سے استعفے دے دیئے تھے۔ ان وزراء کا تعلق حزب اللہ سے تھا۔

رات گئے تک جاری رہنے والے کابینہ کے اجلاس سے قبل وزیرِ اعظم فواد سینیورا نے مستعفی وزراء کو رضامند کرنے کی کوشش کی۔ انہوں نے اجلاس کو دو دن تک ملتوی کرنے کی پیشکش بھی کی لیکن دونوں فریقین کے درمیان مذاکرات ناکام ہو گئے۔

اس کے علاوہ شام کے حمایتی پارلیمانی سپیکر نبیح بیری کی پارٹی کے وزراء بھی اجلاس میں شامل نہیں ہوئے۔ ان کا مطالبہ تھا کہ انہیں حکومت میں مزید اختیارات دیئے جائیں۔

سابق وزیرِ اعظم رفیق حریری کے قتل کے مقدمے کے لیے ایک بین الاقوامی ٹریبونل کی تشکیل کی تجویز ان کے قتل کی تحقیقات کرنے والی اقوامِ متحدہ کی کمیٹی کی طرف سے دی گئی تھی۔

اقوامِ متحدہ کی کمیٹی نے رفیق حریری کے قتل میں شام کے ملوث ہونے کا الزام لگایا تھا لیکن شام ان الزامات کی تردید کرتا ہے۔

کابینہ کی منظوری کی وجہ سے ملک میں شام حمایتی اور شام مخالف گروہوں کے درمیان اختلافات میں شدت آنے کا امکان ہے تاہم اجلاس کے بعد لبنان کے وزیرِ اطلاعات غازی اریدی نے کہا کہ اس فیصلے کا مقصد لبنان میں سکیورٹی کو یقینی بنانا ہے نہ کہ آپس کے تنازعات کو ہوا دینا۔

کابینہ کا ہنگامی اجلاس وزیرِ اعظم فواد سنیورا نے بلوایا۔ حزب اللہ سمیت شام حمایتی رہنما کابینہ کے اس اجلاس کو غیر آئینی قرار دے رہے ہیں کیونکہ ان کے بقول اجلاس سے قبل لبنانی صدر سے اجازت نہیں لی گئی۔

اجلاس کو اس بنیاد پر بھی غیر آئینی قرار دیا گیا ہے کہ اس میں شیعہ آبادی کی ترجمانی بالکل نہیں تھی کیونکہ حزب اللہ کے چھ مستعفی وزراء اجلاس میں شامل ہونے پر رضامند نہیں ہوئے۔

کابینہ کی منظوری کے بعد رفیق حریری کے قتل کے مقدمے کے لیے بین الاقوامی ٹریبونل کے منصوبے پر پارلیمانی سیشن میں رائے دہی کی جائے گی۔ اس طرح وزیرِ اعظم فوواد سینیورا کو ایک بار پھر مشکلات سے دوچار ہونا پڑے گا کیونکہ پارلیمانی اجلاس، پارلیمانی سپیکر ہی بلوا سکتا ہے۔ پارلیمانی سپیکر نبیح بیری نہ صرف شام کے حمایتی ہیں بلکہ ان کی پارٹی کے وزراء نے بھی آج کے اجلاس سے بائیکاٹ کیا تھا۔