صدیروت نامی جنوبی اسرائیلی علاقے میں چھ راکٹ گرے

پولیس کا کہنا ہے کہ غزہ کی سرحد پر صدیروت نامی جنوبی اسرائیلی علاقے میں چھ راکٹ گرے۔

اسرائیلی فوج غزہ کے علاقے میں کافی عرصے سے کارروائیوں میں مصروف ہے جس کا مقصد اسرائیل کے مطابق فلسطین کی جانب سے فائر کیئے جانے والے راکٹوں کو روکنا ہے۔

گزشتہ ہفتے بیت حانون میں ایسے ہی اسرائیلی آپریشن میں 19 فلسطینی ہلاک ہوگئے تھے۔ اسرائیل کا کہنا تھا کہ یہ حملہ کسی تکنیکی خرابی کا نتیجہ تھا۔

تازہ راکٹ فائرنگ کے واقعے کی ذمہ داری کے بارے میں کئی ددعوے کیئے جارہے ہیں جن میں سے ایک دعویدار حماس کی مسلح شاخ کا ایک گروپ بھی ہے۔ گروپ کا کہنا ہے کہ یہ حملہ بیت حانون میں ہونے والی ہلاکتوں کا بدلہ تھا۔

اسرائیل کے وزیر دفاع عامر پریتز کا کہنا ہے کہ ان تنظیموں کو ایسے اقدامات کی بھاری قیمت ادا کرنا ہوگی۔

صدیروت کا شہر وزیر دفاع کا آبائی شہر بھی ہے اور زخمی ہونے والا شخص اس نجی سکیورٹی کمپنی کا رکن ہے جو عامر پریتز کے گھر کی حفاظت کرتی ہے۔

فلسطینی علاقوں میں اسرائیلی فوجی آپریشنز کے نتیجے میں جون 2006 سے اب تک 400 فلسطینی ہلاک ہوچکے ہیں جن میں سے بیشتر عام شہری تھے۔