مسٹر با کیمون 1971 کے بعد پہلے ایشیائی سیکریٹری جنرل ہوں گے

اب امید ہے کہ اقوام متحدہ کی جنرل اسمبلی رواں ہفتے کے دوران ان کی تقرری کے لئے ووٹ ڈالے گی۔

ان کے پیشرو کوفی عنان اکتیس دسمبر کو دس سال تک سیکریٹری جنرل رہنے کے بعد اپنے عہدے سے سبکدوش ہو جائیں گے۔

نامہ نگاروں کا کہنا ہے کہ بان کیمون کو ورثہ میں ایک ایسی اقوام متحدہ ملے گی جس کے اہم اہداف میں دارفور، ایران اور اقوام متحدہ میں اصلاحات شامل ہوں گے۔

اقوام متحدہ کی پندرہ رکنی کونسل نے بان کی مون کی آٹھویں سیکریٹری جنرل کی حیثیت سے نامزدگی کی منظوری دے دی ہے۔

جنوبی کوریا کے باسٹھ سالہ وزیر خارجہ نے کونسل کی غیر رسمی ووٹنگ کے چاروں ادوار میں کامیابی حاصل کی ہے جبکہ اس عہدے کے باقی پانچ امیدواروں نے خود کو اس مقابلے سے باہر کر لیا ہے۔

اقوام متحدہ میں اس بات پر وسیع اتفاق رائے پایا جاتا ہے کہ ادارے کا اگلا سیکریٹری جنرل بر اعظم ایشیاء سے ہونا چاہیئے۔ اس سے قبل برما کے یو تھانٹ واحد ایشیائی سیکریٹری جنرل تھے جو اس عہدے پر انیس سو اکسٹھ سےانیس سو اکہتر تک تعینات رہے۔

اپنی نامزدگی کے بعد بات کرتے ہوئے مسٹر بان نے کہا کہ یہ اننتخاب ان کے لئے اعزاز کی بات ہے اور یہ کہ وہ شمالی کوریا کے جوہری دھماکے کی وجہ سے پیدا ہونے والے بحران کو حل کرنے کی کوشش کریں گے۔

مسٹر بان کے مطابق اگر ان کی تقرری ہو جاتی ہے تو وہ شمالی کوریا کے جوہری معاملے سمیت، جو کہ عالمی امن کے لئے خطرہ ہو سکتا ہے، تمام مسائل کو حل کرنے میں اپنا کردار ادا کریں گے۔

مسٹر بان ایک منجھے ہوئے سفارتکار ہیں جو ترقی کرتے کرتے جنوبی کوریا کے وزیر خارجہ بنے۔

اپنے آئندہ کردار کی کچھ مثالیں دیتے ہوئے انہوں نے کہا کہ وہ اقوام متحدہ کو ایک زیادہ موثر اور مستعد ادارہ بناے کا وعدہ کرتے ہیں۔

نامہ نگاروں کا کہنا ہے کہ مسٹر بان ایک ایسی تنظیم کے سربراہ بن رہے ہیں جسے سوڈان اور لبنان سمیت دنیا کے کئی پیچیدہ ترین مسائل کا سامنا ہے۔