بین الاقوامی امداد کے خاتمے سے فلسطینی اتھارٹی کی کارکردگی متاثر ہوئی ہے

حماس نے اس بات کی تصدیق کرتے ہوئے کہا ہے کہ ابھی اس کی تفصیلات طے ہونا باقی ہیں۔ اگلے چند دنوں میں اس کا رسمی اعلان کر دیا جائے گا۔

فلسطینیوں کو امید ہے کہ اس معاہدے سے ان کی رکی ہوئی بین الاقوامی امداد پھر سے بحال کر دی جائے گی۔ فلسطینی اتھارٹی کے صدر اور جماعت ’الفتح‘ کے سربراہ محمود عباس اور مخالف جماعت ’حماس‘ کے وزیراعظم اسماعیل ہانیہ کے مابین گزشتہ کئی مہینوں سے مذاکرات جاری ہیں۔

مشرق وسطیٰ کے دورے کے دوران برطانوی وزیراعظم ٹونی بلیئر نے کہا تھا کہ
’ فلسطین میں قومی اتحاد پر مبنی حکومت کے تشکیل پانے اور اس ممکنہ حکومت کے اسرائیل کو تسلیم کرنے کی صورت میں بین اقوامی امداد بحال کر دی جائے گی‘۔

حماس کے ترجمان سمیع ابو زہری کا کہنا ہے کہ ’ ہم الفتح سے مل کر حکومت تشکیل دینے کو تیار ہیں مگر اس سلسلے میں ہمیں کوئی شرط منظور نہیں ہے‘۔

دونوں جماعتوں کے مابین اختلافات کی وجوہات میں حماس کا دہشت گردی کو چھوڑنے کا اعلان، اسرائیل کو تسلیم کرنا اور اسرائیل اور اس کا فلسطین کے مابین ہوئے امن معاہدے کو تسلیم کرنا شامل ہیں۔

بین الاقوامی امداد کے خاتمے سے فلسطینی اتھارٹی کی کارکردگی متاثر ہوئی ہے۔ حکومت کے پاس ہزاروں ملازمین کو دینے کے لیئے تنخواہیں نہیں ہیں۔ حال ہی میں اقوام متحدہ نے تنبیہ کی ہے کہ فلسطین میں بنیادی ضروریات زندگی ناپید ہوتی جا رہی ہیں۔

اسرائیل نے کئی ماہ تک غزہ کی سرحدوں کو سیل کر رکھا ہے اور کئی ملٹری آپریشن کیئے ہیں۔ خیال کیا جاتا ہے کہ اگر ایسی کوئی حکومت تشکیل دی گئی اس کی سربراہی حماس کے اسماعیل ہانیہ کریں گے۔