عراق میں مزاحمت کار زائرین کو بھی نشانہ بناتے رہے ہیں (فائل فوٹو)

عراقی پولیس کے مطابق یہ چودہ افراد جمعہ کو کربلا جاتے وقت راستے میں مارے گئے۔

پولیس کا کہنا ہے کہ پاکستانی اور بھارتی زائرین کو ان کی گاڑیوں سے باہر نکال کر گولیاں ماری گئیں۔

پولیس اور ہسپتال کے ذرائع کا کہنا ہے کہ زائرین کے گروہ پر مغربی حصے میں الانبار کے علاقے سے گزرتے ہوئے پہلے سےموجود مسلح افراد نے گھات لگا کر حملہ کیا۔ ملک کا مغربی حصہ سنی مزاحمت کاروں کا گڑھ سمجھا جاتا ہے۔

بعض اطلاعات کے مطابق یہ حملہ تین دن قبل ہوا۔ اطلاعات کے مطابق زائرین کے ہاتھ اور پاؤں باندھ دیئے گئے تھے اور ان پر قریب سے گولیاں ماری گئیں۔ متضاد اطلاعات کے مطابق مرنے والوں میں خواتین بھی شامل ہیں۔

خیال کیا جا رہا ہے کہ زائرین بغداد سے اسی کلومیٹر جنوب میں کربلا میں امام حسین کے مزار کی طرف جا رہے تھے۔ امام حسین کو شیعہ فرقے میں نہایت اہم مقام حاصل ہے اور ہر سال لاکھوں زائرین ان کے مزار پر آتے ہیں۔

یہ ابھی تک واضح نہیں ہے کہ حملہ کیوں کیا گیا تاہم کچھ اعلاعات کے مطابق ان افراد پر ڈاکوؤں نے حملہ کیا جو ان کی چیزیں چوری کرنا چاہتے تھے۔

حالیہ برسوں میں عراق میں تشدد کے باوجود پاکستان، بھارت اور دیگر ممالک سے شیعہ زائرین کربلا اور نجف کا سفر کرتے رہے ہیں۔ گزشتہ ماہ بغداد میں شیعہ زائرین پر مسلح افراد کی فائرنگ سے بیس افراد ہلاک ہو گئے تھے۔