ایران نے جوہری پروگرام ختم کرنے سے انکار کر دیا ہے

رپورٹ میں کہا گیا ہے کہ ایران کے بارے میں خفیہ معلومات اکھٹی کرنے کے لیئے مزید ایسے لوگوں کی خدمات حاصل کی جانے چاہیں جن کو فارسی پر عبور حاصل ہو۔

امریکی کانگرس کی ’ہاوس انٹیلجنس کمیٹی‘ کی رپورٹ میں انکشاف کیا گیا ہے کہ امریکی حکومت کے پاس ایران کی حربی صلاحیت اور خاص طور پر اس کے جوہری بم بنانے کے پروگرام کے بارے میں مصدقہ معلومات نہیں ہیں۔

اس رپورٹ میں سوال اٹھایا گیا ہے کہ کیا ایران کی دفاعی صلاحیت اور جوہری پروگرام کے بارے میں اہم معلومات کے بغیر ایران کے ساتھ کوئی مؤثر بات چیت کی جاسکتی ہے۔

ایران نے اس ہفتے دنیا سے اپنے جوہری پروگرام کے بارے میں مذاکرات کرنے کا عندیہ دیا ہے۔ ایران کا اصرار ہے کہ اس کا جوہری پروگرام خالصتاً پرامن مقاصد کے لیئے ہے اور اس نے اقوام متحدہ کی طرف سے یورینیم کی افزودگی ختم کرنے کے مطالبے کو رد کر دیا ہے۔

ایران کی طرف سے اس کے جوہری پروگرام پر سنجیدہ مذاکرات کرنے کی پیش کش پر واشنگٹن نے بڑا سرد رد عمل ظاہر کیا ہے۔ ایران نے مذاکرات کرنے کی پیش کش مغربی ممالک کی طرف سے جوہری پروگرام بند کرنے کی صورت میں ایران کو دی جانے والی مراعات کے جواب میں کیا تھا۔

ان مراعات کے جواب میں ایران کی طرف سے اکیس صفحات پر مشتمل جواب کی تفصیلات کو عام نہیں کیا گیا تاہم جرمنی کی چانسلر اینجلا مرکل نے کہا ہے کہ ایران نے جوہری پروگرام بند کرنے سے انکار کر دیا ہے۔

اینجلا مرکل نے کہا کہ جو کچھ اکیس صفحے کی ایرانی دستاویز میں کہا گیا ہے اس کا جائزہ لیا جا رہا ہے لیکن یقینی طور پر اس میں وہ کچھ نہیں ہے جس کی توقع کی جارہی تھی۔

انہوں نے کہا کہ اس دستاویز میں وہ فیصلہ کن جملہ موجود نہیں تھا۔

کانگریس کی رپورٹ میں کہا گیا ہے کہ ’ہم ایران کے بارے میں بہت کچھ نہیں جانتے اور پالیسی سازوں کو ایران کے بارے میں مزید معلومات درکار ہیں۔‘

رپورٹ میں ایران کے جوہری، کیمیائی اور بائیولوجیکل ہتھیاروں کے بارے میں معلومات نہ ہونے پر خصوصی طور پر تشویش ظاہر کی گئی۔