گیٹ وک پر اب بھی پروازیں منسوخ کی جا رہی ہیں۔

کمبریا سے تعلق رکھنے والے بارہ سالہ لڑکے کی گیٹ وک ائرپورٹ پر مونارک کمپنی کے ایک طیارے میں موجودگی کا احساس عملے کو اس وقت ہوا جب مسافروں کی تعداد گنجائش سے بڑھ گئی۔

مونارک کے منیجنگ ڈائریکٹر ٹم جینز نے اعتراف کیا کہ چند مسئلے ہیں جنہیں حل کرنے کی ضرورت ہے۔ ان کا کہنا تھا کہ یہ بھی اہم ہے کہ آخری سکیورٹی لائن نے اپنا کام ضرور کیا۔ ’یقینا ایسا نہیں ہونا چاہیے تھا۔‘

ائرپورٹ کا انتظام چلانے والے ادارے بی اے اے نے بتایا کہ لڑکا سکیورٹی انتظامات سے گزر کر طیارے تک پہنچا۔

بی اے اے کے اہلکار کا کہنا تھا کہ اس واقعے کی مکمل تفتیش پولیس اور مونارک ائرلائن کے ساتھ کی جا رہی ہے۔ ’ہم تسلیم کرتے ہیں کہ وہ سفری دستاویزات کے بغیر وہاں تک پہنچا لیکن ہمیں یقین ہے کہ وہ تلاشی کے تمام مراحل سے ضرور گزرا ہے۔

انہوں نے مسافروں کو یقین دلایا کہ کہیں بھی ان کی زندگی کو خطرے میں نہیں ڈالا گیا تھا۔

ایک نجی فلاحی ادارے سے بھاگا ہوا یہ لڑکا لزبن جانا چاہ رہا تھا۔ لڑکے کے طیارے میں پہنچنے پر اسے مشروب بھی پیش کیا گیا تھا۔

اس فلاحی ادارے کے ترجمان نے کہا کہ اس کی گمشدگی کے فوراً بعد اس کی اطلاع پولیس کو دے دی گئی تھی۔

ادھر گیٹ وک ہوائی اڈے پر مسافروں کو مسلسل تاخیر کا سامنا ہے۔ بدھ کے روز برٹش ائرویز کی گیارہ پروازیں منسوخ کی گئی ہیں۔