ہوائی اڈے پر مسافروں کی طویل قطاریں لگ گئیں

اتوار کو بھی لندن کے مرکزی ہیتھرو ائرپورٹ سے اڑنے والی ایک تہائی پروازوں کو منسوخ کر دیا گیا ہے۔

ہیتھرو ائرپورٹلا کے حکام کا کہنا ہے کہ یہ منسوخی ضروری تھی کیونکہ اس سازش کے سامنے آنے کے بعد جو حفاظتی انتظامات متعارف کروائے گئے ہیں ان کی موجودگی میں تمام پر وازوں کا مقررہ وقت پر اڑنا ممکن نہیں ہے۔

تاہم ہوائی کمپنیوں نے پروازوں کی منسوخی کا ذمہ دار ائرپورٹ انتظامیہ کو ٹھہرایا ہے اور ان کا کہنا ہے کہ ائرپورٹ حکام نئے قوانین لاگو ہونے کے بعد حالات سے نمٹنے میں ناکام رہے ہیں۔ رائن ائر نامی ہوائی کمپنی نے برطانوی حکومت پر زور دیا ہے کہ وہ ہوائی اڈوں پر مزید حفاظتی عملہ تعینات کرے تاکہ موجودہ صورتحال پر قابو پایا جا سکے۔

جمعرات اور جمعہ کی درمیانی شب طیارے تباہ کرنے کی مبینہ سازش کے سلسلے میں چوبیس افراد کی گرفتاری کے بعد جہاں برطانیہ میں حملوں کے ممکنہ خطرے کا درجہ بلند ترین سطح تک بڑھا دیا گیا تھا وہیں سکیورٹی خدشات کے تحت ملک کے تمام ہوائی اڈوں پر حفاظتی انتظامات سخت کر دیئے گئے تھے۔

	دستی سامان ایک شفاف لفافے میں لے جایا جا سکتا ہے

حفاظتی اقدامات کے تحت مسافروں پر پابندی عائد کی گئی تھی کہ وہ سفری دستاویزات، ادویات اور چند دیگر اشیائے ضرورت کے علاوہ کسی قسم کا دستی سامان جہاز پر اپنے ساتھ نہیں لے جا سکتے۔ اس کے علاوہ ہوائی اڈوں پر تمام مسافروں کی جامہ تلاشی کا عمل بھی شروع کیا گیا جس کی وجہ سے ’چیک ان‘ کے عمل میں زیادہ وقت لگا اور ہوائی اڈوں پر مسافروں کی طویل قطاریں لگ گئیں۔

برطانوی ہوائی اڈوں کی اس ہنگامی صورتحال کا اثر اندرونِ ملک پروازوں پر تو پڑا ہی لیکن اس سے برطانیہ آنے والی بین الاقوامی پروازیں بھی شدید متاثر ہوئیں۔ طویل فاصلے کی پروازوں کے مسافروں کو پرواز کے وقت سے چارگھنٹے قبل ہوائی اڈے پر پہنچنے کو کہا گیا اور ان اقدامات کے باوجود ہیتھرو سے روانہ ہونے والی متعدد بین الاقوامی پروازوں کو مسافروں اور سامان کی مکمل تلاشی میں لگنے والے وقت کی وجہ سے منسوخ کرنا پڑا۔