حسن مجتبی سان ڈیاگو، کیلفورنیا

	صدر بش نے وائٹ ہاوس کے لان پر صحافیوں سے بات کی

یہ بات انہوں نے اتوار کی دوپہر وائٹ ہائوس کے لان پر میامی کے دورے پر روانہ ہونے سے قبل اخباری نمائندوں سے کہی۔ وہ مشرق وسطی کی تازہ صوتحال پر ایک مختصرخطاب کر رہے تھے-

وائٹ ہائوس سے جاری ہونے والے بیان میں کہا گیا ہے کہ صدر جارج بش نے کہا ہے کہ ’مشرق وسطی کا موجودہ بحران ہم سے تقاضہ کرتا ہے کہ ہم وہاں پائیدار امن کے لیئے مل کر کام کریں۔ میں بے گناہ انسانی جانوں کے ضیاع پر سوگوار ہوں- یہ ایک المناک موقع ہے جب بےگناہ لوگ ہلاک ہوئے ہیں۔ ہماری ہمدردیاں ان لوگوں کے لیے ہیں جو آج ہلاک ہوئے اور جنہوں نے جاری اس بحران میں جانیں گنوائيں-‘

انہوں نے کہا کہ انہوں نے اتوار کے روز وزیر خارجہ کونڈولیزا رائس سے دو مرتبہ رابطہ کیا اور ’وہ اگلے روز (پیر کو) دورے سے واپس آرہی ہیں اور مجھے مشرق وسطی کے رہنماوں سے اپنی ملاقاتوں کے بارے مجھے آگاہ کریں گی-‘

صدر بش نےکہا ’میں نے ٹونی بلیئر سے بھی بات کی ہے- امریکہ نے سلامتی کائونسل کے رکن ممالک کے ساتھ مل کرخطے میں پائيدار امن قائم کرنے کے لیے متفقہ قرارداد لانے کا تہیہ کر رکھا ہے۔ ایک ایسا امن جو پائدار ہو اور جس میں ماں باپ اپنے بچوں کی پرورش ایک امیدوں بھری دنیا میں کر سکیں-
'خدا ان پر رحم کرے جنہوں نے اپنی جانیں گنوائيں‘۔ یہ صدر بش کے وائٹ ہاوس کے سبزہ زار پر اخباری نمائندوں سے ان کے بیان کے اخری الفاظ تھے۔

لیکن پبلک ٹییلی وژن سی ایس پی اے این نے صدر بش کے میامی روانہ ہونے سے قبل پس منظر میں کھڑا ان کا ہیلی کاپٹر اور اپنے محتصر بیاں کے اختتام پر ان کو جاتے دکھایا اور پس منظر میں وہاں موجود اخباری نمائندوں کو سوالات کے لیئے ان کو متوجہ کرنے کی آوازیں اور صدر بش کے سوالات نہ لینے اور پس منظر میں اخباری نمائندوں کی تالیوں کی آواز بھی سنائي جنکی گونج میں صدر اپنے ہیلی کاپٹر پر سوار ہونے لگے۔