ناظمہ نے دس منٹ تک شیر کا مقابلہ کیا

پولیس ذرائع کے مطابق یہ واقعہ سندربن کے جنگلات کے قریب پیش آیا۔

تفصیلات کے مطابق اٹھارہ سالہ ناظمہ اختر اپنے پچیس سالہ شوہر انوار الاسلام کے ہمراہ سندربن کے کنارے مچھلیاں پکڑ رہی تھیں کہ شیر نے ان کے شوہر پر حملہ کیا اور انہیں گھسیٹ کر جنگل میں لے جانے کی کوشش کی۔

پولیس کے مطابق شیر نے انوار الاسلام کاگھٹنا منہ میں دبا کر انہیں گھسیٹنے کی کوشش کی جس پر ناظمہ نے چپو سے شیر پر حملہ کر دیا اور اسے بھاگنے پر مجبور کر دیا۔ مقامی پولیس کے سربراہ اے ایس ایم زاہد کے مطابق ناظمہ نے دس منٹ تک شیر کا مقابلہ کیا۔

اے ایس ایم زاہد نے بی بی سی کو بتایا کہ’یہ خاتون انتہائی بہادر ہیں کیونکہ انہوں نے تن تنہا شیر کا مقابلہ کیا اور اپنے شوہر کو بچایا۔ میں ان کی جرات کو سلام کرتا ہوں‘۔

بنگلہ دیشی پولیس اور محکمۂ جنگلات کے حکام کا کہنا ہے کہ گزشتہ ہفتے بھی سندربن کے جنگلات میں شیروں کے حملے میں دو خواتین ہلاک ہوئی ہیں۔ بنگلہ دیش میں سندربن کے شیر ہر سال اوسطاً بیس افراد کو ہلاک کر دیتے ہیں۔