حبا صالح بی بی سی نیوز، قاہرہ

	مصر میں ہزاروں کی تعداد میں مجسمے موجود ہیں

ان افراد کو خدشہ ہے کہ اس فتوے سے بنیاد پرست عوامل کی حوصلہ افزائی ہوگی کہ وہ فراعنہ کے زمانے کے ورثے کو تباہ کرنے کی کوشش کریں۔

یہ فتوٰی مصر کے ایک مفتی کی جانب سے جاری کیا گیا ہے۔ اسلام میں ہر اس تصویر یا مجسمہ بنانے کی حوصلہ شکنی کی گئی ہے جو کسی بھی طرح انسانی شکل سے مماثلت رکھتا ہو۔

مصر میں ہزاروں کی تعداد میں مجسموں پر مشتمل قدیمی ورثے کے علاوہ بڑے شہروں میں جدید طرز پر بنائے گئے مجسمے بھی شامل ہیں۔

کئی تنقید کار تو حیران ہیں کہ ایسا فتوٰی جاری ہی کیوں کیا گیا لیکن حقیقت یہ ہے کہ ان دنوں مصری افراد زندگی کے تقریباً ہر معاملے ہی میں مذہبی رہنمائی حاصل کرنے پر مائل ہیں۔

مصر میں ویب سائٹ کے ذریعے بھی مذہبی تشہیر اہم رخ اختیار کرتی جا رہی ہے۔ اسلام آن لائن ایسی ہی ایک ویب سائٹ ہے۔ اس کے مدیر محمد امین کا کہنا ہے کہ انہوں نے ایک سیکشن ’ آسک آ سکالر‘ (عالم سے پوچھیئے) کے نام سے شروع کیا ہے جس میں لوگ مذہبی مسائل پر رہنمائی حاصل کر سکتے ہیں۔

	فتوے میں مجسموں کی نمائش کی مذمت کی گئی ہے

مصری معاشرے میں فتوے لینے کا رجحان زور پکڑتا جارہا ہے اور اس وقت اٹھایا جانے والا مجسموں کا معاملہ بھی ایسے ہی ایک سوال کے بعد سامنے آیا جس میں ایک شخص نے مجسموں کی اسلامی حیثیت کے بارے میں پوچھا تھا۔

’پولیٹیکل اینڈ سٹریٹیجک سٹڈیز‘ کے الاحرام سینٹر کے محمد السید سعد کے مطابق مصر کے عوام میں مذہبی رجحان بڑھ رہا ہے۔ ان کا کہنا ہے کہ یورپی معاشرے کے وہ ماڈل جو انیسویں اور بیسویں صدی میں یہاں اثر انداز ہوئے تھے، اب ان کی جگہ اسلامی طرز زندگی سے تبدیل ہوتی جارہی ہے۔ سعد کے مطابق ملک کے اپنے اندر سیکولر اور مذہبی حلقوں میں خلیج بھی بڑھتی جارہی ہے۔

ان حالات میں یہ کوئی باعث حیرت بات نہیں کہ مصر میں مذہبی جماعتیں تیزی سے مقبول ہورہی ہے۔ کالعدم قرار دیئے جانے کے باوجود اسلامی تنظیم کے پاس پارلیمان کی بیس فیصد نشستیں ہیں۔ تجزیہ کاروں کا کہنا ہے کہ اس جماعت کی مقبولیت کی وجوہات میں ملک میں سیاسی طور پر پائی جانے والی پابندیاں، معیشت کی منفی کارکردگی اور امریکہ کے ساتھ تعلقات پر عوام میں بڑھتی بے چینی شامل ہیں۔ سید سعد کا کہنا ہےکہ اگر ملک میں سیاسی سرگرمیوں پر یونہی پابندی رہی تو اسلام لوگوں کے مستقبل کا نظریہ بن جائے گا۔

تاہم اس بات سے قطع نظر کہ ملک میں سیاسی طور پر کیا ہوتا ہے، فی الحال تو یہ واضح ہے کہ مستقبل قریب میں مذہب وہ قوت بنتا جارہا ہے جس سے لوگ زندگی کے معاملات میں زیادہ سے زیادہ رہنمائی حاصل کرنے کے خواہشمند ہیں۔