حال ہی میں تہرے بم دھماکے میں 79 افراد ہلاک ہوئے

عراق میں موجود امریکی حکام کی اس رپورٹ میں کہا گیا ہے کہ اٹھارہ میں سے چھ صوبوں میں صورتِ حال پُر تشویش ہے جب کہ ایک صوبے میں سنگین ہے۔

رپورٹ کے مطابق عدم استحکام کا نشانہ یہ صوبے عراق کے شمال اور مغرب میں ہیں اور ان میں اکثریت سُنیوں کی ہے۔

اس رپورٹ کی تفصیلات امریکی اخبار نیویارک ٹائمز نے شائع کی ہیں۔

اخبار کا کہنا ہے کہ صوبے بصرہ کے بارے میں رپورٹ ملیشیا سرگرمیوں اور جرائم کے بارے میں تشویش ظاہر کرتی ہے۔

بصرہ کا نظم و نسق اتحاد میں شامل برطانوی افواج کے ہاتھ میں ہے۔

دریں اثناء عراقی حکومت نے مصری صدر حسنی مبارک کے اس ٹیلی ویژن انٹرویو پر کڑی تنقید کی ہے جس میں انہوں نے کہا تھا کہ عراق میں تشدد کی صورتِ حال خانہ جنگی کی سی ہے اور خطرہ ہے کہ یہ خانہ جنگی عراقی سرحدوں سے بھی باہر پھیل سکتی ہے۔