افغانستان کے دور دراز علاقوں میں اب بھی طالبان سرگرم ہیں

بغدیس کے گورنر عنایت اللہ عنایت نے کہا ہے کہ اتوار کی شام مسلح افراد نے ایک ڈاکٹر اور کئی نرسوں کو ہلاک کرکے عمارت کو آگ لگادی۔

انہوں نے بتایا کہ سکیورٹی فورسز حملے کی تحقیقات کررہی ہیں۔ یہ واقعہ ایک ایسے علاقے میں پیش آیا ہے جہاں اب تک طالبان سرگرم نہیں رہے ہیں۔

ایک دوسرے واقعے میں جنوبی صوبے ہلمند میں ایک بارودی سرنگ کے پھٹنے سے افغان پولیس کے دو اہلکار ہلاک اور دو زخمی ہوگئے۔

یہ واقعہ اس وقت پیش آیا جب پولیس کے یہ اہلکار پوست کی کاشتکاری کے خلاف مہم کے تحت گشت کررہے تھے۔

نامہ نگاروں کا کہنا ہے کہ ہلمند کے علاقے میں مشتہ طالبان سکیورٹی فورسز کو نشانہ بناتے رہے ہیں۔ افغانستان میں پوست کی کاشت اسی علاقے میں سب سے زیادہ ہوتی ہے۔