ٹی وی شو ’سیکس اینڈ دی سٹی‘ کی اداکارائیں جس میں خواتین کو موج مستی کے لیےتعلق قائم کرتےدکھایاگیا

سروے کے نتائج کے مطابق دس میں سے نو خواتین ایک رات کے تعلق کو غیر اخلاقی سمجھتی ہیں لیکن ان میں سے بہت خود بھی ایسا کر چکی تھیں اور وہ ایسا کرنے والی خواتین کو غلط نہیں کہنا چاہتی تھیں۔

سروے میں شامل خواتین کی اکثریت نے ایک رات کا تعلق قائم کرنے والی خواتین پر تنقید نہیں کی لیکن ان کا کہنا تھا کہ ایسا کرنے والی خواتین کی زندگی میں کوئی کمی ضرور ہوتی ہے۔

خواتین میں سیکس کے رجحان پر تحقیق کرنے والے محقق کی توقعات کے برعکس بڑی تعداد میں خواتین کا سیکس کے بارے میں رجحان روایتی ہے۔

شیفیلڈ میں تحقیق کرنے والی ماہرین کی ٹیم نے تئیس سے تراسی سال تک کی چھیالیس خواتین سے پوچھ گچھ کی جن میں سے صرف دس فیصد نے کہا کہ مرد کے ساتھ مستقل تعلق کے امکان کے بغیر سیکس کرنے میں حرج نہیں۔

سروے کرنے والی ٹیم میں شامل ڈاکٹر شیرون ہِنچکلف نے روزنامہ ڈیلی ٹیلیگراف کو بتایا کہ ’ہمارے نتائج ہمارے تاثر کے مطابق نہیں تھے کہ آج کی آزاد عورت بغیر کسی مستقل تعلق کے بھی جنسی مزے حاصل کر سکتی ہے‘۔

’ایک تاثر دیکھنے میں آیا ہے کہ ایک رات کا جنسی تعلق قائم کرنے والی خواتین جنسی مزے کے علاوہ دیگر وجوہات کے لیے ایسا کرتی ہیں جن میں نشے کا اثر، بے صبری یا زندگی میں کسی چیز کی تلاش یا کمی کا احساس شامل ہیں‘۔