ایران کے سابق صدر نے مغربی ممالک کے رویے کو سامراجی قرار دیا ہے۔

اکبر ہاشمی رفسنجانی حج کے موقع پر ایرانی ٹی وی پر بات کر رہے تھے۔

انہوں نے ایران کے اپنے جوہری پروگرام جاری رکھنے کے فیصلے کا دفاع کرتے ہوئے کہا کہ یہ فیصلہ صحیح ہے لیکن اس میں احتیاط ضروری ہے کیونکہ یہ اب کافی حساس معاملہ بن گیا ہے۔

ایران کی جانب سے یورینیم کی از سرِ نو افزودگی کے اعلان کے بعد عالمی سطح پر سخت ردِ عمل سامنے آیا تھا۔

سابق صدر رفسنجانی نے کہا کہ وہ حیران ہیں کہ جمہوریت، انسانی حقوق اور آزادی کے موجودہ دور میں بین الاقوامی برادری نے اتنے دادا گیری والا رویہ اپنایا ہے۔

ان کا کہنا تھا کہ ’سامراج‘ مغربی ممالک کی کوشش ہے کہ لوگوں کو لاعلمی اور جہالت کے حال میں رکھا جائے اور ’یہ ان کے امرانہ سوچ اور امتیازی سلوک کی مثال ہے۔‘

ایران کے سابق صدر کی یہ باتیں ٹیلی وژن پر براہ راست نشر ہوئیں۔

مغربی ممالک نے کیا کہا تھا

ایران کی جانب سے یورینیم کی از سرِ نو افزودگی کے اعلان کے بعد عالمی سطح پر سخت ردِ عمل سامنے آیا تھا اور واشنگٹن میں وائٹ ہاؤس کے ترجمان سکاٹ مکلیلن نے کہا تھا کہ اس صورتحال پر امریکہ اپنے حلیفوں سے مشاورت کر رہا ہے اور ایسے لگتا ہے کہ ایران پر ممکنہ پابندیاں لگانے کے لیے ایران کے جوہری پروگرام کے معاملے کو اقوام متحدہ کی سلامتی کونسل میں لے جانے کے سوائے عالمی برادری کے پاس اب کوئی راستہ نہیں بچا۔

ادھر برطانیہ کے وزیر خارجہ جیک سٹرا نے کہا تھا کہ وہ اس معاملے کو سلامتی کونسل میں لے جانے کے ضمن میں بات چیت کے لیے فرانس اور جرمنی کے وزرائے خارجہ سے کل ملاقات کر رہے ہیں۔

روس نےبھی اپنی تشویش کا اظہار کرتے ہوئے کہا تھا کہ اس معاملے کو سیاسی اور سفارتی انداز سے حل کیا جانا چاہیے۔

عالمی جوہری ادارے کے سربراہ محمد البرادعی نے کہا تھا کہ انہیں اس بات پر شدید تشویش ہے کہ ایران اپنے نیوکلیئر پروگرام کی معطلی ختم کر رہا ہے حالانکہ ابھی عالمی ادارے کے معائنہ کار اس پروگرام کی اصل حقیقت سے واقف ہی نہیں ہو سکے۔

مغربی ممالک کو تشویش ہے کہ ایران جوہری ہتھیار بنانا چاہتا ہے جبکہ ایران کا اصرار ہے کہ اس کا پروگرام مکمل طور پر پرامن ہے۔ اس معاملے پر اب یورپی اتحاد کے ممالک کا ایک اہم اجلاس جمعرات کو ہو رہا ہے۔