حماس پارلیمانی انتخابات میں فتح تنظیم کو چیلنج کرے گی

اس کا چینل یروشلم میں واقع مسجدِ العقصٰی کے نام پر العقصیٰ رکھا گیا ہے اور اس چینل کا صدر دفتر غزہ میں ہوگا۔ بتایا گیا ہے کہ اس چینل پر قرآن کی روشنی میں سیاسی اور سماجی تصورات کے حوالے سے پروگرام نشر کیے جائیں گے۔

حماس کا کہنا ہے کہ اس کا ارادہ ہے کہ وہ اس ٹی وی چینل کو وسعت دے اور سیٹلائٹ براڈکاسٹنگ میں شریک ہو جائے۔

بی بی سی کے نامہ نگار ایلن جانسٹن نے غزہ سے اپنے مراسلے میں کہا ہے کہ ٹی وی چینل کے قیام سے ظاہر ہوتا ہے کہ حماس تنظیم بتدریج آگے کو بڑھ رہی ہے۔

لگتا ہے کہ یہ گروپ اب حزبِ اقتدار الفتح کے لیے پارلیمانی انتخابات کی مہم کے دوران ایک بڑا چیلنج بن کر ابھرے گا۔

غزہ میں حماس کے ایک رہنما کا کہنا تھا کہ تین سے چھ ماہ تک اس چینل کی نشریات آزمائشی طور پر جاری رکھی جائیں گی۔

فتحی حماد کے مطابق چینل کا مقصد یہ ہے کہ حماس کا پیغام فلسطینی عوام اور دنیا کے سامنے رکھا جا سکے۔ ’اس چینل کا مقصد اسلامی ثقافت کا قیام اور روحِ اسلام سے مطابقت رکھنے والے سائنسی اور سیاسی زاویۂ نگاہ کا پرچار ہے۔ اس کے علاوہ چینل کا کام اہم امور سے متعلق اطلاعات کی فراہمی ہوگا۔‘

اتوار کو اس چینل کی پہلی نشریات میں آدھ گھنٹے تک قرآن کی تلاوت دکھائی گئی تاہم اگلے چند ماہ میں توقع ہے کہ حماس اس چینل کے ذریعے خبریں بھی نشر کرے گی اور دستاویزی پروگرام بھی دکھائے گی۔

چینل سے اسرائیل اور فلسطین کے درمیان قضیئے سے متعلق حماس کی تشریح کو بھی لوگوں تک پہنچایا جائے گا۔

حماس کا مطالبہ ہے کہ فلسطینی علاقوں سے اسرائیلی قبضے کا خاتمہ ہو اور یہ کہ اسرائیلی ریاست کو تباہ ہو جانا چاہیے۔

اٹھارہ ماہ پہلے غزہ میں اسرائیلی ہیلی کاپٹروں نے حماس کے ریڈیو سٹیشن پر راکٹ داغ کر اسے تباہ کر دیا تھا۔