شیرون کی عمر ستر 77 سال ہے

بدھ کی شب دماغ کی شریان پھٹنے سے بےہوشی کی حالت میں وزیراعظم شیرون کو یروشلم کے ایک ہسپتال میں داخل کیا گیا ہے جہاں ان کے دماغ کا گزشتہ شب دو بار آپریشن کیا گیا۔

جمعرات کی صبح ہداثہ ہسپتال کے ڈائریکٹر شلومو مور یوسف نے بتایا: ’ان کی حالت مستحکم ہے۔ تمام اشارے معمول کی حد تک ہیں لیکن ان کی حالت سنگین ہے۔‘

ڈائریکٹر کے مطابق مسٹر شیرون آئندہ چوبیس گھنٹے تک بے ہوشی کی دوا کے زیر اثر ریسپی ریٹر پر رہیں گے۔

ہسپتال کے ڈائریکٹر کا یہ بیان اس آپریشن کے بعد دیا گیا ہے جو شیرون کو دوبارہ دورہ پڑنے کے بعد کیا گیا تھا۔ ڈاکٹروں نے شیرون کے دوسرے دورے کو ’اہم‘ بتایا ہے۔

ڈاکٹروں کے مطابق شیرون کے دماغ کی نس پھٹنے کی وجہ سے کافی خون بہہ رہا تھا جس کی وجہ سے انہیں دوبارہ آپریشن کرنا پڑا۔

وزیراعظم شیرون کے نائب اور وزیر خزانہ یہود اولمرت نے قائم مقام وزیراعظم کی ذمہ داریاں سنبھال لی ہیں۔ اسرائیلی قوانین کے تحت وہ سو دن تک قائم مقام وزیراعظم کا عہدہ پر فائز رہ سکتے ہیں۔

دریں اثنا اسرائیلی وزارت انصاف نے کہا ہے کہ مسٹر ایریئل شیرون کی علالت کے باوجود ملک میں عام انتخابات شیڈول کے مطابق 28 مارچ کو ہی ہوں گے۔

بدھ کی شب ڈاکٹروں نے ایک پریس کانفرنس میں بتایا تھا کہ دل کے سوراخ میں خون جمع ہونے کے باعث دماغ کو خون پہنچانے والی شریان بند ہوگئی تھی۔

اسرائیلی وزیراعظم نے گزشتہ ماہ لیکود پارٹی چھوڑ کر ایک نئی جماعت ’قادیمہ’ تشکیل دی ہے۔ اب لیکود پارٹی کی سربراہی شیرون کے حریف بنیامن ناتنیاہو کے پاس ہے۔ شیرون سن دو ہزار ایک سے اسرائیل کے وزیر اعظم ہیں۔

فلسطینی حکام کا کہنا ہے کہ صدر محمود عباس نے اسرائیلی وزیر اعظم کے آفس فون کر کے مسٹر شیرون کی صحت پر تشویش کا اظہار کیا ہے۔

فلسطین کے چیف مذاکرات کار صائب اریکات کے مطابق انہیں مسٹر شیرون کے بیماری کے فلسطینی عوام پر ممکنہ اثرات پر شدید تشویش ہے۔ ممکنہ نتائج کے سلسلے میں انہوں نے فلسطینیوں کی طرف مزید سخت اسرائیلی رویہ، مزید یہودی بستیوں اور مزیر فلسطینی خونریزی کا ذکر کیا۔

دوسری طرف شدت پسند فلسطینی تنظیم حماس نے کہا ہے کہ دنیا اپنے بدترین لیڈر کے چھٹکارہ حاصل کرنے کے دہانے پر کھڑی ہے۔

یروشلم میں بی بی سی کے نامہ نگار جیمز رینالڈز کا کہنا ہے کہ اسرائیل کے عوام اس امید کا منتظر ہیں کہ کیا ان کے جہاں دیدہ رہنما صحتیاب ہوسکیں گے اور بعض لوگ یہ بھی سمجھتے ہیں کہ ان کا سیاسی کریئر اب ختم ہی ہوگیا ہے۔