اس سال بیس لاکھ سے زائد مسلمان حج کی سعادت حاصل کر رہے ہیں

سعودی عرب کی وزارتِ داخلہ کے مطابق ہوٹل کی عمارت گرنے سے بیس حجاجِ کرام ہلاک اور دیگر کئی زخمی ہوئے ہیں۔

متحدہ عرب امارات کے سرکاری خبر رساں ادارے کے مطابق متحدہ عرب امارات کے چار شہری ہوٹل کے ملبے کے نیچے آکر ہلاک ہو گئے ہیں۔

اطلاعات کے مطابق امدادی کارکن ملبے سے لاشیں نکالنے میں مصروف ہیں۔ حادثے کے وقت ہوٹل میں عازمین حج کی ایک بڑی تعداد موجود تھی۔

خیال کیا جاتا ہے کہ ہلاک ہونے والے عازمین حج کا تعلق مصر، نیونس اور متحدہ عرب امارات سے تھا۔

مکہ مکرمہ سے صحافی سراج وہاب کے مطابق اس حادثے میں درجنوں افراد کے زخمی ہونے کا خدشہ ہے۔ ان کا کہنا ہے کہ اب تک ملبے سے بتیس لاشیں نکالی گئی ہے۔

یاد رہے کہ حج کے موقع پر پہلے بھی کئی حادثات ہو چکے ہیں۔ ان میں سے بدترین حادثے میں سن انیس سو نوے میں ایک سرنگ میں بھگدڑ مچنے سے ایک ہزار سے زائد پاؤں کے نیچے روندے گئے تھے۔