انتخابات کے بعد تشدد کی وارداتوں میں تیزی آئی ہے

خود کش حملہ شمالی عراق کے قصبے مقدادیہ میں ہوا اور اس سے کم از کم تیس اہل ِتشیع عراقی ہلاک اور درجنوں زخمی ہو گئے۔ اس حملے میں خود کش بمبار نے اہل تشیع کے ایک جنازے کو نشانہ بنایا۔

ایک دوسرے واقعے میں بغداد کے جنوبی علاقے میں ایک بازار میں ہونے والے کار بم دھماکے میں کم از کم سات افراد کی ہلاکت کی اطلاع ہے۔ بغداد میں تشدد کے کئی اور واقعات پیش آئے جن میں کئی افراد ہلاک ہوگئے ہیں۔

حکام کے مطابق سو سے زیادہ عراقی مقدادیہ میں ایک مقامی سیاستدان کے محافظ کے جنازے میں شریک تھے کہ ان پر خود کار ہتھیاروں اور مارٹر گولوں سے حملہ کیا گیا۔

اس حملے سے ہجوم میں بھگدڑ مچ گئی اور اسی افراتفری کے دوران خودکش حملہ آور نے اس ہجوم میں دھماکہ کر دیا۔ خود کش دھماکے کے بعد جائے حادثہ پر ہر طرف انسانی اعضاء اور خون پھیل گیا۔

عراقی پولیس کے افسر سلمان حسین نے خبر رساں ادارے ایسوسی ایٹڈ پریس کو بتایا کہ یہ’دہشت گردی کی کارروائی تھی‘ اور اس کا مقصد شیعہ سنّی خانہ جنگی کو ابھارنا تھا۔

انہوں نے کہا کہ ’ان دھماکوں کے پیچھے کارفرما لوگ عراق میں عدم استحکام چاہتے ہیں اور مزید خون بہانا چاہتے ہیں‘۔

مقدادیہ کے علاقے میں پہلے بھی تشدد کے واقعات ہوتے رہے ہیں مگر یہ حملہ گزشتہ ماہ ہونے والے انتخابات کے بعد ہونے والا سب سے بڑا خود کش حملہ تھا۔