اجتماعی قبروں کے شواہد صدام حسین کے خلاف استعمال کیے جا سکتے ہیں

خیال ہے کہ اس اجتماعی قبر میں پائی جانے والی لاشیں ان افراد کی ہیں جنہیں صدام حسین کی فوج نے انیس سو اکانوے میں خلیجی جنگ کے وقت ہلاک کیا تھا۔

کہا جارہا ہے کہ یہ اقدام شیعہ اکثریت کی بغاوت کا سر کچلنے کے لیے کیا گیا تھا۔ اس تنازعہ میں تیس ہزار افراد کو ہلاک کیا گیا تھا جن میں سے بیشتر کو بعد میں اجتماعی قبروں میں دفنایا گیا تھا۔

کربلا میں یہ اجتماعی قبر اس وقت دریافت ہوئی جب وہاں مزدوروں نے ایک پائپ لائن بچھانے کے لیے کھدائی کا کام شروع کیا۔ جب انہوں نے لاشیں دیکھیں تو فوری طور پر پولیس کو مطلع کیا جس نے پھر علاقے کی ناکہ بندی کردی۔

وہاں پائے جانے والے افراد بچوں، عورتوں اور مردوں کی لاشوں کو ان کے کپڑوں سے شناخت کیا گیا ہے۔

صدام حکومت کے خاتمے کے بعد سے اب تک کئی اجتماعی قبریں دریافت ہوچکی ہیں جن میں سے بیشتر کردوں کے شمالی اور شیعہ اکثریت والے جنوبی علاقوں میں پائی گئی ہیں۔

سابق عراقی صدر صدام حسین اور ان کی حکومت کے دیگر سات اہلکاروں پر انیس سو بیاسی میں دجیل میں ایک سو ارتالیس افراد کے قتل کا الزام ہے تاہم وہ ان الزامات کی تردید کرتے ہیں۔