کونوری نے سات بار جیمز بانڈ کا کردار ادا کیا

سکاٹ لینڈ سے تعلق رکھنے والے پچھتر سالہ اداکار نے اعزاز وصول کرتے ہوئے کہا کہ ان کی خواہش تھی کہ ان کے اعزاز حاصل کرنے کے وقت سکاٹ لینڈ آزاد ہوتا اور اس کی یورپ کے معاملات میں آواز ہوتی۔

سکاٹش نیشنل پارٹی نے کونری کے کلمات کو خوش آمدید کہا۔

ماضی میں جیمز بانڈ کا کردار ادا کرنے والے کونری کو ان کے اداکاری کے شعبے میں پچاس سالہ پر محیط کیریئر کے اعتراف میں اعزاز دیا گیا ہے۔ انہوں نے ستّر فِلموں میں کام کیا۔

سکاٹش نیشنل پارٹی کے ایک ترجمان نے کہا کہ ’سکاٹش نیشنل پارٹی کو سر شان کی حمایت ملنے پر فخر ہے‘۔ہم انہیں اس اعزاز پر مبارکباد پیش کرتے ہیں‘۔

جن فلموں میں شان کونری نے کام کیا ان میں اے برج ٹُو فار، مارنی، انڈیانا جونز، دی لاسٹ کروسیڈ اور دی لیجنڈ آف زورو شامل ہیں۔ وہ سات بار جیمز بانڈ کے روپ میں آئے۔ جیمز بانڈ کے سلسلے کی فلموں میں سے انہیں خاص طور پر انیس سو باسٹھ میں ’ڈاکٹر نو‘ اور انیس سو تراسی میں بننے والی فِلم ’نیور سے نیور اگین‘ کی وجہ سے یاد کیا جاتا ہے۔

کونری کو انیس سو اٹھاسی میں ’دی ان ٹچ ایبل‘ میں معاون اداکار کا کردار ادا کرنے پر آسکر انعام دیا گیا۔انہیں سن دو ہزار دو میں ملکہ نے سر کا خطاب دیا تھا۔