ان فلسطینیوں کی لاشیں جو اردن کے بم دھماکوں میں ہلاک ہوگئے

ان دھماکوں میں ستاون ہلاکتیں ہوئی تھیں۔ خصوصی دعاؤں کے علاوہ مختلف مقامات پر دھماکوں کے خلاف مظاہروں کا اہتمام بھی کیا گیا ہے۔

اسی دوران اردن سے اظہارِ ہمدردی و یکجہتی کے لیے اقوامِ متحدہ کے سیکرٹری جنرل کوفی عنان اردن پہنچ گئے ہیں۔

اردن کے کئی شہروں میں خصوصی طور پر لوگ مساجد میں ہونے والی خصوصی دعاؤں میں شریک ہوئے ہیں۔ اردن کے شاہ عبداللہ بھی ہاشمی مسجد گئے جہاں انہوں نے دیگر افراد کے ساتھ دعا میں شرکت کی۔

یہ اعلان بھی کیا گیا ہے کہ ان دھماکوں میں زخمی ہونے والے ہالی وڈ کے مشہور ہدایتکار مصطفے عکاظ، جو انیس سو ستتر میں اسلام پر بننے والی فلم ’دی میسیج‘ کے ڈائریکٹر بھی تھے، انتقال کر گئے ہیں۔ وہ شام میں پیدا ہوئے تھے اور انہوں نے کئی فلموں میں اپنی ہدایتکاری کے جوہر دکھائے تھے۔

القاعدہ تنظیم نے عمان کے تین ہوٹلوں میں ہونے والے ان بم دھماکوں کی ذمہ داری قبول کی ہے۔ ایک نئے بیان میں تنظیم نے کہا ہے کہ جن ہوٹلوں کو نشانہ بنایا گیا وہاں اسلام کے خلاف جنگ کی تیاریاں ہو رہی تھیں۔ تاہم آزادانہ طور پر اس بیان کی حتمی تصدیق نہیں ہو سکی۔

دریں اثناء اردن کی سکیورٹی ایجنسیاں بم دھماکوں کے ملزموں کی تلاش میں ہیں اور حفاظتی انتظامات سخت کر دیے گئے ہیں۔