لندن بم دھماکوں کے بعد برطانیہ میں سکیورٹی میں اضافہ کیا گیا ہے

بولٹن کراؤن کورٹ کو بتایا گیا کہ انتالیس سالہ گریم مینارڈ جولائی کے لندن بم دھماکوں سے اتنا مشتعل تھا کہ اس نے راچڈیل کے علاقے میں ایک ایشیائی ریستوران کے نزدیک ایک جعلی بم رکھا اور یہ بھی کہا کہ دوسرا بم بریڈ فورڈ میں رکھا جائے گا۔

مقدمے کی سماعت کرنے والے جج کا کہنا تھا کہ ملزم کی اس حرکت سے برطانیہ کے کثیر القومی معاشرے میں دہشت گردی کو فروغ ملا۔

ان کا کہنا تھا کہ ’ کسی کو بھی اس واردات کو معمولی نہیں سمجھنا چاہیے اور یہ کوئی دلیل نہیں کہ یہ لندن بم دھماکوں کا رّدِ عمل ہے۔ یہ صرف ایک مجرمانہ کارروائی ہے‘۔

عدالت کو یہ بھی بتایا گیا کہ مینارڈ نے شراب کےنشے میں اپنے ساتھیوں کے سامنے یہ شیخی بھی بگھاری کہ ’ اگر کسی کو کیمیا کے مضمون کی سوجھ بوجھ ہے تو اس کے لیے بم بنانا بالکل مشکل نہیں‘۔

مینارڈ نے باروچی خانے میں استعمال ہونے والے سامان کو ایک ڈبے میں رکھ کر اس پر ایک نقلی ڈیٹونیٹر، تاریں اور ایک موبائل فون لگا کر اسے ایک بم کی شکل دی اور اسے ایک ریستوران کے باہر رکھ دیا۔

بم کی اطلاع ملنے پر فوج کے بم ڈسپوزل یونٹ نے اس جعلی بم کو اڑا دیا۔

خبروں میں اس واردات کا ذکرنہ آنے پر مینارڈ نے مایوس ہو کر 999 پر فون کیا اور کہا کہ’ کیا آپ کو ملک سٹون روڈ راچڈیل پر بم ملا۔ وہ ایک جعلی بم تھا اور اگلا بم اصلی ہوگا اور اسے بریڈ فورڈ میں رکھا جائےگا‘۔

اس کال کے بعد پولیس اہلکاروں نے اس کے موبائل فون کا پتہ لگا کر مینارڈ کو گرفتار کر لیا تھا۔