شیر بہادر دوبا کو فروری میں نیپال کے بادشاہ نے برطرف کر دیا تھا

شیر بہادر دوبا پر ایک متنازعہ سڑک کی تعمیر کے لیے کمیشن لینے پر نو کروڑ روپے جرمانہ بھی عائد کیا گیا ہے۔

وہ نیپالی تاریخ کے اعلیٰ ترین رہنما ہیں جن پر رشوت لینے کا الزام ثابت ہوا ہے۔ شیر بہادر دوبا نے ان الزامات کو رد کر دیا ہے۔ انہوں نے خبر رساں ادارے ایسوسی ایٹڈ پریس سے بات کرتے ہوئے کہا کہ ’ یہ ایک بے بنیاد مقدمہ ہے، یہ ایک سیاسی قتل ہے اور ہم سیاسی طور پر اس کا مقابلہ کریں گے‘۔

عدالت نے اپنے فیصلے میں ایک سابق وزیر پرکاش مان سمیت چار افراد کو بھی مجرم قرار دیا۔

نیپال کی انسانی حقوق کی تنظیموں نے نیپال کے بادشاہ کی جانب سے قائم کردہ اس عدالت کے فیصلے کو اختلافِ رائے پر پابندی قرار دیا ہے۔

شیر بہادر دوبا کو فروری میں نیپال کے بادشاہ نے برطرف کر دیا تھا اور وہ انسدادِ رشوت کے اس شاہی کمیشن کو پہلے ہی غیر آئینی اور غیر قانونی قرار دے چکے ہیں۔

گزشتہ تین ماہ سے نظر بند مسٹر دوبا نےاس کمیشن کے سامنے پیش ہونے اور وکلائے صفائی کی مدد لینے سے انکار کر دیا تھا۔ مسٹر دوبا اب سپریم کورٹ میں اپیل کریں گے۔