ایران کے انتخابات پر امریکی تشویش

امریکی وزارت خارجہ نے کہا کہ احمدی نژاد کے منتخب ہونے سے ظاہر ہوتا ہے کہ ایران خطے کے دورسرے ملکوں ، عراق اور افغانستان میں پائی جانے والی آزادی کی لہروں سے مستفید نہیں ہوسکا اور ان کے ساتھ قدم ملا کر چلنے میں ناکام رہا ہے۔

وزارتِ خارجہ کی ایک ترجمان نے کہا کہ انتخاب کا پورا نظام ہی ناقص ہے کیونکہ اس میں ایک ہزار امیدواروں کو جن میں ترانوے خواتین بھی شامل ہیں انتخاب لڑنے کی اجازت نہیں دی گئی۔

ادھر برطانیہ کے وزیر خارجہ جیک سٹرا نے ایران میں صدراتی انتخاب پر رد عمل ظاہر کرتے ہوئے کہا کہ ایران کو اپنے جوہری پروگرام کے بارے میں دنیا کے خدشات پر فوری توجہ دینی چاہیے۔

امریکی ترجمان نے کہا کہ ان کے ملک کو شک ہے کہ ایرانی حکومت کو اپنے عوام کی خواہشات اور مغربی دنیا کی تشویش سے کوئی دلچسسپی ہے۔

انہوں نے کہا ایران کے عوام کو یہ حق حاصل ہے کہ وہ اپنے فیصلے خود کریں اور اپنے مستقبل کا خود تعین کریں۔