امریکی ریاست فلوریڈا کے ایک ڈاکٹر کی رائے میں صحت مند اور سمارٹ رہنے کا بہترین طریقہ یہ ہے کہ ہم خود سے یہ سوال کریں کہ اس موقع پر ’یسوع مسیح کیا کھاتے؟‘ ڈاکٹر ڈان کالبرٹ نے اپنی کتاب میں عہد نامۂ قدیم میں خوراک سے متعلق قواعد کا جائزہ لیتے ہوئے انجیل (بائیبل) میں درج مختلف کھانوں پر غور کیا ہے۔ ڈان کالبرٹ کا کہنا ہے کہ ’اگر آپ زندگی کے تمام شعبوں میں یسوع مسیح کی صحیح معنوں میں پیروی کرنا چاہتے ہیں تو کھانے کی عادات کو نظر انداز کیسے کیا جا سکتا ہے۔‘ ’امریکی عوام کی عمومی صحت خراب ہوتی جا رہی ہے جس کی بنیادی وجہ خوراک کا ناموزوں انتخاب ہے۔ موٹاپا وبا کی طرح ہر طرف پھیلتا جا رہا ہے۔ لوگ دباؤ میں خوراک کھانے لگتے ہیں، کہیں جاتے وقت کھانا کھاتے ہیں اور کھانے کی مقدار میں بھی اضافہ ہوتا جا رہا ہے۔‘ ’اگر لوگوں پر بائیبل کی تعلیمات واضح کی جائیں تو وہ نہ صرف اپنی خوراک کے بارے میں محتاط ہو جائیں گے بلکہ ان کا طرز زندگی بھی بہتر ہو جائے گا۔‘ روایت ہے کہ یسوع مسیح نے اپنے آخری کھانے میں روٹی اور وائن استعمال کی تھی۔ ڈاکٹر کالبرٹ کہتے ہیں کہ ’یسوع مسیح نے بنیادی طور پر قدرتی خوراک اصل حالت میں کھائی جس سبزیاں، بینز اور دالیں شامل تھیں۔ انہوں نے گندم کی روٹی، پانی اور وائن بھی استعمال کی ہو گی۔‘ | 
یہ صفحہ دوست کو ای میل کیجیئے
پرِنٹ کریں
