برہام صالح اور کمال خرازی

ایرانی وزیرخارجہ نے گزشتہ روز عراق کے اپنے دورے میں عراقی حکام کو یقین دلایا کے ان کا ملک ماضی کی تلخ یادیں بھلاتے ہوئے ہر میدان میں عراق کی مدد کا خواہاں ہے۔

انہوں نے عراق کے نومنتخب عبوری وزیراعظم ابراہیم الجعفری سے بھی ملاقات کی۔ ایرانی وزیر خارجہ کمال خرازی امریکی حملے کے بعد وہ عراق جانے والے ایران کے سب سے اعلیٰ عہدے دار ہیں۔

انہوں نے اپنے عراقی ہم منصب سے ملاقات کی ہے جس کے بعد عراقی وزیر خارجہ ہوشیار زبیری نے کہا کہ دونوں ملکوں میں اب زیادہ تعاون ہوگا لیکن ایک دوسرے کے معاملات میں دخل اندازی نہیں کی جائے گی۔

بی بی سی کے ایک تجزیہ نگار کا کہنا ہے کہ عراق کی نئی حکومت، جس پر شیعوں کا غلبہ ہے، ایران سے تعلقات بہتر کرنے پر زور دے رہی تھی اور اب کمال خرازی کے دورے سے دو قدیمی دشمن ملکوں کے درمیان دوستانہ فضا قائم کرنے میں مدد ملے گی۔