جارج گیلوے نے لیبر پارٹی کو کہا ہے کہ وہ ٹونی بلیئر کو فارغ کر دے۔

جارج گیلوے کو پچھلے سال لیبر پارٹی سے اس وقت نکال دیا گیا تھا جب انہوں نے برطانوی فوجیوں سے کہا تھا کہ وہ عراق میں لڑنے سے انکار کردیں۔

گیلوے نے اس کے بعد ’ریسپکٹ‘ نامی پارٹی قائم کی تھی اور برطانیہ کے مسلمانوں اور جنگ مخالف ووٹروں سے اپیل کی تھی کہ وہ ان کی حمایت کریں۔

ریسپیکٹ پارٹی کے جارج گیلوے نےمشرقی لندن میں لیبر کی محفوظ نشست بیتھنل گرین اور بو میں لیبر کی اوونا کنگ کو شکست دیکر کامیابی حاصل کی ہے۔

جارج گیلوے ایک ایسے حلقے سے جیتے ہیں جس میں مسلمانوں کی کافی آبادی ہے۔ گیلوے نے حلقے کی بلدیاتی انتظامیہ پر بھی الزام لگایا کہ انہوں نے ان کو ہرانے کی پوری کوشش کی تھی۔بلدیاتی انتظامیہ نے ابھی تک اس پر کوئی ردِ عمل ظاہر نہیں کیا ہے۔

اپنی کامیابی کے بعد انہوں نے کہا لیبر پارٹی ہار عراق کی وجہ سے ہے اور لیبر کو جہاں جہاں شکست ہوئی ہے اس کی وجہ عراق ہے۔

انہوں نے مزید کہا’ جن لوگوں کو آپ نے قتل کیا ہےاور اس جنگ میں جو بھی جانی نقصان ہوا ہے وہ سب آپ کا پیچھا نہیں چھوڑیں گے اس وقت لیبر پارٹی کو چاہئے کہ وہ آپ کو فارغ کر دے‘۔

جارج گیلوے کا مقابلہ لیبر پارٹی کی امیدوار اوونا کنگ سے تھا جو بلئیر وفاداروں میں سے ہیں اور عراق جنگ کی حامی تھی۔

انتخابی مہم کے دوران محترمہ کنگ کی کار کے ٹائر پھاڑ دئے گئے تھے اور ان پر انڈے اور سبزیاں پھینکی گئی تھیں۔

پچاس سالہ گیلوے کا کہنا تھا کہ یہ دنیا کا سب سے اچھا کام ہے اور لیبر کے ساتھ جو ہوا اس پر انہیں بہت خوشی ہے۔

انہوں نے اپنی مخالف محترمہ کنگ کی تعریف کرتے ہوئے کہا انہوں نے پچھلے آٹھ سالوں میں حلقے میں بہت کام کیا ہے انہوں نے کہا کہ وہ ایک قابل انسان ہیں اور سیاست اور پارلیمنٹ میں واپس آجائیں گی۔انہوں نے مزید کہا کہ یہ ان کی نہیں بلکہ لیبر پارٹی کی ہار ہے۔

محترمہ کنگ کا کہنا تھا کہ انہیں لیبر کی کامیابی پر بہت فخر ہے۔