مہلک ہتھیاروں کا کوئی سراغ نہیں ملا ہے

مہلک ہتھیاروں کے امریکی معائنہ کار چارلس ڈیلفر کا کہنا ہے کہ جہاں تک ممکن تھا عراق کے وسیع پیمانے پر تباہی پھیلانے والے ہتھیاروں کی تلاش کا کام کیا گیا۔

ڈیلفر نے عراق پر امریکہ حملے سے قبل ان مبینہ ہتھیاروں کے سرکاری سطح پر شام منتقل کیے جانے کے امکان کو بھی رد کر دیا۔

امریکی سی آئی اے کے ایک مشیر نے گزشتہ سال کہا تھا کہ عراق میں مہلک ہتھیاروں کو کوئی ذخیرہ اور ماضی قریب میں ان کی تیاری کے کوئی شواہد نہیں ملے ہیں۔

تاہم ڈیلفر نے کہا ہے کہ صدام حسین یہ ہتھیار بنانے کا ارادہ رکھتے تھے۔

اٹھارہ ماہ تک وسیع پیمانے پر تباہی پھیلانے والے ہتھیاروں اور ان سے متعلق حراست میں لیے گئے لوگوں سے تفتیش کے بعد ان ہتھیاروں کا کوئی نشان نہیں ملا ہے اور یہ کام بند کر دیا گیا ہے۔

ڈیلفر نے اپنی رپورٹ میں کہا ہے کہ عراق میں ایسے ماہرین موجود ہیں جن کی خدمات ہمسایہ ممالک یا دہشت گرد گروپ حاصل کرکے ایسے ہتھیار بناسکتے ہیں۔ تاہم انہوں نے کہا کہ اس بات کا امکان کم ہے لیکن اس خطرے کو نظر انداز نہیں کیا جاسکتا۔

اس ضمنی رپورٹ میں کہا گیا ہے کہ ایک بہت ہی معمولی کیمیائی ہتھیار سے بہت زیادہ تباہی پھیلائی جاسکتی ہے جو کہ انتہائی طاقت ور روائتی ہتھیار کے استعمال سے بھی ممکن نہیں۔

ڈیلفر نے کہا کہ مہلک ہتھیاروں کے بین الاقوامی گروپ کو یقین ہے کہ عراق سے ایسے کوئی ہتھیار یا ان کی تیاری میں استعمال ہونے والا کسی قسم کا مواد عراق پر حملے سے پہلے شام منتقل نہیں کیا گیا تاہم اس بات کا خدشہ موجود ہے کہ غیر سرکاری طریقے سے کچھ مواد اِدھر ا ُدھر ہو گیا ہو۔

امریکہ اور برطانیہ نے وسیع پیمانے پر تباہی پھیلانے والے ہتھیاروں کو بہانہ بنا کر سن دوہزار تین میں عراق پر حملہ کر دیا تھا۔