کمال برغاس ایک پولیس آفیسر کو ہلاک کرنے کے جرم میں عمر قید کی سزا کاٹ رہے ہیں

الجیریا سے تعلق رکھنے والے 31 سالہ کمال برغاس پہلے ہی ایک پولیس افسر کو چھرا گھونپ کر ہلاک کرنے کے جرم میں عمر قید کاٹ رہے ہیں۔

گزشتہ ہفتے چار دیگر افراد کو سازش میں شریک ہونے کے الزام سے بری کر دیا گیا تھا۔

انسدادِ دہشت گردی کے ادارے کے سربراہ پیٹر کلارک نے کہا کہ ایک ’حقیقی اور مہلک خطرہ‘ دور ہو گیا ہے۔

بی بی سی کے نامہ نگار کے مطابق برطانوی حکام کا خیال ہے کہ پورے یورپ میں حیاتیاتی اور کیمیائی حملے کرنے کا منصوبہ بنایا گیا تھا۔ جبکہ لندن میں انڈرگراؤنڈ ٹرینوں پر بھی حملے کرنے کا منصوبہ تھا۔

حکام کا خیال ہے کہ پیرس میں میٹرو اور آئفل ٹاور ٹارگٹ تھے۔

جنوری 2003 میں انسدادِ دہشت گردی کے سکواڈ نے شمالی لندن کے علاقے وڈ گرین کے ایک فلیٹ پر چھاپہ مارا تھا جہاں سے انہیں کیمیائی ہتھیار بنانے والی ایک مشتبہ لیبارٹری ملی تھی۔

چھاپے کے بعد پولیس نے پورے ملک میں برغاس کو ڈھونڈنا شروع کر دیا اور بالآخر 14 جنوری 2003 کو وہ مانچسٹر سے پکڑے گئے۔

گرفتاری سے پچنے کی کوشش میں برغاس نے پولیس آفیسر سٹیفن اووک کو چھرا گھونپ کر ہلاک کر دیا اور چار دیگر پولیس والوں زخمی کر دیا۔

جون 2004 میں برغاس کو عمر قید کی سزا سنائی گئی تھی۔