کونڈالیزا رائس اور محمود عباس

انہوں نے یقین دہانی کرائی کہ امریکہ فروغِ امن کے سلسلے میں عملی طور پر شریک ہو گا لیکن اسرائیل اور فلسطین کو اپنا اپنا کردار ادا کرنا ہو گا۔

امریکی وزیر خارجہ نے جنرل ولیم وارڈ کو علاقے میں سیکیورٹی کے حوالے سے امریکہ کا رابطہ کار نامزد کیا ہے۔

امریکہ نے آئندہ نوے روز میں فلسطینی انتظامیہ کی امداد کے لیے چار کروڑ ڈالر کی امداد کا وعدہ بھی کیا ہے۔

لیفٹیننٹ جنرل ولیم وارڈ

غرب اردن میں فلسطینی رہنما محمود عباس کے ساتھ ملاقات کے دوران کونڈالیزا رائس نے امن کے عمل کے لیے امریکی نگرانوں کی موجودگی کی بھی یقین دہانی کرائی ہے۔

محمود عباس نے اسرائیل سے بھی کہا ہے کہ وہ امن کے فروغ کے لیے اقدامات کرے۔

انہوں نے اس امید کا اظہار کیا کہ منگل کو ایریل شیرون سے ملاقات کے دوران امن کا عمل مزید آگے بڑھے گا۔

شرم الشیخ میں اسرائیل اور فلسطین کے درمیان امریکی شمولیت کے بغیر ہونے والے مذاکرات سنہ دو ہزار میں انتفادہ کے آغاز کے بعد سب سے اعلیٰ سطحی مذاکرات ہوں گے۔

اس سے پہلے امریکی وزیرِخارجہ نے اسرائیلی وزیراعظم سے ملاقات کی ہے اور کہا ہے کہ اسرائیل کو فلسطینیوں کے ساتھ امن قائم کرنے کے لیے کڑے فیصلے کرنے ہوں گے۔

امریکی وزیرِخارجہ کونڈالیزا رائس مشرقِ وسطیٰ کے سات روزہ دورے کے سلسلے میں اسرائیل پہنچیں اور اسرائیلی وزیراعظم سے ملاقات کی۔

کہا جا رہا ہے کہ ان کے دورے کا مقصد فلسطین اور اسرائیل کے درمیان قیامِ امن کی کوششوں میں مزید تیزی لانا ہے۔

انہوں نے اسرائیلی وزیراعظم سے ملاقات کے بعد امن کے لیے امریکی عزم کا اعادہ کرتے ہوئے کہا کہ یہ وقت امن کے لیے ایک موقع ہے۔

انہوں نے کہا: ’میں خاص طور پر قیام امن کے عمل سے متعلق صدر بش اور اپنا ذاتی عزم لے کر یہاں آئی ہوں کیونکہ اس وقت مشرق وسطی میں قیام امن کا موقع ہے اور اسے ہاتھ سے نہیں جانے دینا چاہئے‘۔

امریکی وزیرخارجہ سوموار کو غرب اردن جائیں گی جہاں وہ فلسطینی لیڈروں سے بات چیت کریں گی۔

ان ملاقاتوں کے دوران انہیں منگل کو مصر میں ہونے والی اسرائیل فلسطین سربراہ ملاقات کی تیاریوں کے بارے میں آگاہ کیا جائے گا۔

یہ گزشتہ چار برس کے دوران فلسطین اور اسرائیل کے مابین ہونے والا اعلیٰ سطح کا پہلا رابطہ ہو گا۔

نومبر میں یاسر عرفات کی وفات اور گزشتہ ماہ محمود عباس کے انتخاب سے علاقے کی سیاسی صورتحال میں واضح تبدیلی آئی ہے۔