 |  الیکشن کے بعد تشدد میں کمی کی توقع کی جارہی تھی |
عراق میں انتخابات کے ایک ہفتے کے بعد بھی پر تشدد کارروائیوں میں کوئی کمی واقع نہیں ہوئی ہے اور ہفتے کے روز آٹھ عراقی اور دو امریکی فوجی ہلاک ہو گئے ہیں۔ تشدد کے تازہ واقعات میں بصرہ میں موٹر سائیکل میں دھماکہ خیز مواد چھپا کر کئے گئے ایک حملے کے نتیجے میں چار عراقی فوجی ہلاک ہو گئے۔ جبکہ عراق کے شمالی شہر بیجی میں سڑک کے کنارے نصب بم کے پھٹنے سے دو امریکی فوجی ہلاک ہو گئے اس کے علاوہ بارودی سرنگ کے پھٹنے سے دو عراقی بچے بھی ہلاک ہوئے ہیں۔ عراق میں الیکشن کمیشن کا کہنا ہے کہ آئندہ جمعرات تک انتخابات کے ابتدائی نتائج موصول ہو جائیں گے ۔ البتہ انتخابات کے اب تک موصولہ نتائج کے مطابق شیعہ مسلم تنظیم کا پلہ بھاری ہے۔ شیعوں کے ایک ممتاز سربراہ نے اس توقع کا اظہار کیا ہے ملک کا نیا وزیر اعظم شیعہ تنظیم سے ہی ہو گا۔ یہ بات عراق کے عبوری وزیر اعظم ایاد علاوی کے لیے ایک دھچکے سے کم نہیں کیونکہ انہیں امید تھی کہ عراق کے آئندہ وزیر اعظم کا عہدہ وہ خود سنبھالیں گے۔ دریں اثناء سنی مذہبی رہنماؤں کی ایسوسی ایشن کا کہنا ہے کہ وہ اس وقت تک آئین کی تشکیل میں حصہ نہیں لے گی جب تک تمام سیاسی جماعتیں غیر ملکی افواج کے عراق سے جانے کی تاریخ کا حتمی تعین نہیں کرتیں۔ | 
یہ صفحہ دوست کو ای میل کیجیئے
پرِنٹ کریں
