جان پال دوئم 27 برس سے پوپ کے عہدے پرفائز ہیں

چوراسی سالہ پولش نزاد مذہبی رہنما کو منگل کی رات فلو اور سانس لینے میں دشواری کے سبب روم کے ایک ہسپتال میں لے جایا گیا تھا۔

حکام کا کہنا ہے کہ وہ ابتداء میں پوپ کی حالت کے بارے میں فکرمند تھے لیکن اب ان کی حالت تسلی بخش ہے۔

پوپ جان پال دوئم رعشہ اور جوڑوں کی تکلیف کے مریض بھی ہیں۔

وہ آخری بار اتوار کو عوام کے سامنے آئے تھے اور اس کے بعد بیماری کے سبب ان کی تمام مصروفیات منسوخ کر دی گئی تھیں۔

ستمبر 2003 کے بعد یہ پہلا موقع ہے کہ پوپ ہر بدھ کو ہونے والی عوامی ملاقات میں شریک نہیں ہوں گے۔

پوپ جان پال دوئم گزشتہ 455 برس میں منتخب ہونے والے پہلے غیراطالوی مذہبی رہنما ہیں۔وہ اس وقت بیسویں صدی کے کم عمر ترین پوپ بنے تھے جب 1978 میں 58 سال کی عمر میں انہیں رومن کیتھولک فرقے کا اعلیٰ ترین مذہبی رہنما چنا گیا تھا۔

جان پال دوئم 27 برس سے پوپ کے عہدے پرفائز ہیں اور دنیا بھر میں ایک ارب سے زیادہ افراد ان کے ماننے والے ہیں۔