 |  ان فنڈز کے استعمال میں بے احتیاطی پر بہت سے عراقی مشتعل ہیں |
عراق کی تعمیر نو کے لیے تیل کی آمدنی سے حاصل کیے گئے تقریباً نو ارب ڈالر کے فنڈز لاپتہ ہوگئے ہیں۔ بی بی سی کے ایک پروگرام کے مطابق عراق پر امریکی قبضے کے دوران تیل کی تجارت سے 20 ارب ڈالر کا منافع حاصل کیا گیاتھا تاہم اس میں سے آٹھ اعشاریہ آٹھ ارب ڈالر کی رقم لاپتہ ہے اور کسی کو نہیں معلوم کہ اس رقم کا کیا بنا۔ امریکی حکومت کے آڈیٹرز نے عراق میں اتحادی افواج کی جانب سے فنڈز کے استعمال میں بد انتظامی پر کڑی تنقید کی ہے۔ ان کا کہنا ہے کہ ان فنڈز کو جس لاکر میں رکھا گیا تھا اس کی چابی ایک دفتر میں موجود ایک کھلے بیگ میں رکھی گئی تھی۔ چیف آڈیٹر جنجر کروز کا کہنا ہے’اقوام متحدہ کی قرارداد کے برعکس جس میں کہا گیا تھا کہ عراق کی تعمیر نو کے لیے جمع کی جانے والی رقم صرف اور صرف عراقیوں کی بہبود کے لیے استعمال ہو، اتحادی فوج کا اندرونی کنٹرول نامناسب تھا‘۔ اس سے قبل بھی گزشتہ سال آڈیٹرز کی ایک رپورٹ میں یہ شواہد پیش کیے گئے تھے کہ عراق کی تعمیر نو کے لیے جمع شدہ فنڈز کے ساتھ بے احتیاطی برتی جارہی ہے۔ ایک موقع پر ڈیڑھ ارب ڈالر کے فنڈز تین ہیلی کاپٹرز کے ذریعے بینک تک پہنچائے گئے تھے کیونکہ ان کا وزن 14 ٹن تھا۔ تاہم بینک میں رقم جمع کرانے کی کوئی رسید منظر عام پر نہیں آئی۔ ایک امریکی ادارے پر یہ الزام بھی ہے کہ اس نے جعلی کمپنیوں کے نام پر اور جعلی رسیدیں دکھا کر اپنے بھاری منافع ظاہر کیے ہیں۔ دیگر کمپنیوں نے ناجائز کمیشن وصول کیےہیں جو کہ تمام کے تمام عراقی پیسے سے حاصل کیے گئے ہیں۔ بی بی سی کے ایک نامہ نگار کے مطابق ان فنڈز کے استعمال میں بے احتیاطی پر بہت سے عراقی مشتعل ہیں۔ خاص طور پر ایسے حالات میں جب عراقی تیل سے حاصل کی گئی رقم غیر ملکی کاروباری اداروں کے ہاتھوں میں چلی گئی۔ عراقی گورننگ کونسل کے ایک سابق برطانوی مشیر کلاڈ ہینکیس ڈریلزما کا کہنا ہے کہ فنڈز پر کنٹرول کی کمی امریکی حکومت کے لیے ایک اور دھچکا ہے۔ آڈیٹرز کی رپورٹ کے جواب میں اتحادی افواج کے سابق سربراہ پال بریمر نے کہا ہے کہ آڈیٹرز ان حالات کو سمجھنے میں ناکام رہے ہیں جن میں اتحادی افواج عراق میں کام کررہی ہیں۔ ان کا کہنا تھا کہ بین الاقوامی اکاؤنٹنگ کے قوانین کو جنگی حالات والے علاقوں پر لاگو نہیں کیا جاسکتا۔ | 
یہ صفحہ دوست کو ای میل کیجیئے
پرِنٹ کریں
