دو کار بم دھماکوں میں کئی افراد زخمی ہوئے

اطلاعات کے مطابق وزارت داخلہ کے قریب ہونے والے پہلے بم دھماکے میں ایک شخص ہلاک ہوا ہے۔

دوسرا دھماکہ اس وقت ہوا جب حملہ آور نے کار کو سعودی سپیشل فورسز کے دفاتر میں گھسنے کی کوشش کی۔ اس دھماکے میں چار افراد زخمی ہوگئے۔

چونکہ دونوں حملے رات کے وقت ہوئے اس لیے زخمیوں اور ہلاک ہونے والوں کی تعداد کم رہی۔

وزات داخلہ کے قریب دھماکے کی وجہ سے وزارت کے دفاتر اور دوسری عمارتوں کے شیشے ٹوٹ گئے۔ جس کے بعد علاقے کے تمام راستوں کو بند کر دیا گیا۔

سیکیورٹی فورسز کا کہنا ہے کہ انہوں نے دوسرے کار بم کو ناکارہ بنا دیا تھا جس کے بعد حملہ آوروں اور گارڈز کے درمیان فائرنگ کا تبادلہ ہوا۔

بدھ کے روز ہونے والے حملوں کے دو ہفتے قبل القاعدہ کے رہنما اسامہ بن لادن نے ایک ویڈیو ٹیپ میں اپنے پیغام میں اپنے حامیوں سے کہا تھا کہ وہ سعودی حکومت کے خلاف اٹھ کھڑے ہوں۔

اس ماہ کے شروع میں شدت پسندوں کے جدہ میں امریکی قونصل خانے پر حملے میں نو افراد ہلاک ہو گئے تھے۔