علی حسن الماجد کو عرفِ عام میں کیمیکل علی کہا جاتا ہے

اعلیٰ تحقیقاتی جج نے کہا کہ سابق جنرل علی حسن الماجد جنہیں عرفِ عام میں کیمیکل علی کہا جاتا ہے اور سابق وزیرِ دفاع سلطان ھاشم احمد سے پوچھ گچھ کی گئی ہے۔

صدام حسین کے عم زاد اور سابق فوجی جنرل علی حسن الماجد پر الزام ہے کہ 1980 کی دہائی میں انہوں نے حلبجہ کے شہر میں کیمیائی گیس کے ذریعے ہزاروں کرد باشندے ہلاک کر دیئے تھے۔

سنیچر کو جب کیمیکل علی کو بغداد میں جب ایک جج کے سامنے پیش کیا گیا تو ان کے ہمراہ صدام حسین کے وزیرِ دفاع سلطان ہاشم احمد بھی تھے۔

ان دونوں سے پوچھ گچھ کرنے والے جج نے بتایا کہ اصل مقدمہ شروع ہونے سے پہلے اس طرح کی ابتدائی سماعت عام عدالتی کارروائی کا حصہ ہوتی ہے۔ انہوں نے واضح کیا کہ اس سماعت کا یہ مطلب ہرگز نہیں ہے کہ اصل مقدمے کی کارروائی اب شروع ہو چکی ہے۔

انہوں نے صحافیوں کے سوالوں کا جواب دیتے ہوئے کہا کہ مقدمہ شروع کرنے کی حتمی تاریخ ٹریبونل طے کرے گا جو کہ ایک آزاد ٹریبونل ہے اور موجودہ عراقی حکومت کے اثرو رسوخ سے ماورا ہے۔