وہ پل جو بھارت اور پاکستان کے زیر انتظام کشمیر کو دو حصوں میں تقسیم کرتا ہے

اس غیر رسمی ملاقات کا انتظام کینیڈا کی ایک غیر سرکاری تنظیم پگواش نے کیا ہے۔

امن کے لیے نوبل انعام یافتہ تنظیم پگواش عالمی مسائل پر معروف سکالرز اور رہنماؤں کو دعوت فکر دیتی ہے تاکہ وہ تنازعات کے غیرمسلح حل کے لیے بات چیت کرسکیں گے۔

اس کانفرنس میں حریت کانفرنس کے رہنما عمر فاروق، ڈیموکریٹک فریڈم پارٹی کے رہنما شبیر شاہ اور جموں و کشمیر لبریشن فرنٹ کے یاسین ملک شریک ہیں۔ لیکن سید علی شاہ گیلانی کو، جو حریت کانفرنس کے سخت گیر دھڑے کی رہنمائی کرتے ہیں، اس کانفرنس میں شرکت کی دعوت نہیں دی گئی ہے۔

اے پی ایچ سی کے ترجمان میر واعظ عمر فاروق نے بھارت کی جانب سے اس کانفرنس میں شرکت کی اجازت دیئے جانے کو ایک اچھا اقدام قرار دیا ہے۔

پاکستان کے زیر انتظام کشمیر کے سرکردہ رہنماؤں میں سردار عتیق احمد شامل ہیں جو حکمراں مسلم کانفرنس کے صدر ہیں۔

کھٹمنڈو سے بی بی سی اردو سروس کے شکیل اختر نے اطلاع دی ہے کہ یہ کانفرنس دو دن تک جاری رہی گی اور کانفرنس کے اختتام پر ایک متفقہ قرار داد بھی منظور کی جائے گی۔

کانفرنس کا مقصد دونوں ملک کے عوام کو مسئلہ کشمیر کے پر امن کے لیے ذہنی طور پر تیار کرنا بھی ہے۔