’آپ کی سیکورٹی بش، کیری یا القاعدہ کے ہاتھ میں نہیں بلکہ خود آپ کے ہاتھ میں ہے۔‘

خیال کیا جارہا ہے کہ یہ ویڈیو امریکی الیکشن سے پہلے ریکارڈ کی گئی تھی کیونکہ اس میں الزواہری نے بظاہر امریکی عوام سے خطاب کرتے ہوئے کہا ہے کہ ’ووٹ چاہے کس کو بھی ڈالیں، بش ، کیری یا خود شیطان کو، ہمیں جس چیز کی پرواہ ہے وہ یہ ہے کہ ہماری زمین سے جارحیت پسند نکل جائیں۔‘

اس سے پہلے امریکی انتخابات سے چند روز قبل خود اسامہ بن لادن کی بھی ایسی ویڈیو سامنے آئی تھی۔

الزواہری نے امریکی عوام کو کہا،’آپ کی سیکورٹی بش، کیری یا القاعدہ کے ہاتھ میں نہیں بلکہ خود آپ کے ہاتھ میں ہے۔‘

ویڈیو میں الزواہری کو ایک براؤن پس منظر میں ایک سفید پگڑی اور چشمے پہنے دکھایا گیا ہے اور ان کے پہلو میں ایک بندوق رکھی ہوئی ہے۔

الزواہری نے ویڈیو میں کہا کہ ’میں امریکیوں کو ایک حتمی صلاح دینا چاہتا ہوں کہ انہیں مسلمانوں کے ساتھ سلوک کے دو طریقوں میں سے ایک اپنانا ہوگا۔ یا تو آپ مسلمانوں کے ساتھ عزت اور باہمی مفاد کے تحت پیش آئیں یا پھر انہیں ایک آسان شکار سمجھیں لیکن آپ کو یہ سمجھ لینا چاہئیے کہ مسلمان برداشت کا مادہ رکھتے ہیں اور وہ آخری وقت تک لڑتے رہیں گے۔‘