برطانیہ میں ایک ایکسپریس ٹرین کے حادثے میں چھ افراد ہلاک اور درجنوں زخمی ہو گئے ہیں۔ یہ حادثہ لندن کے مغرب میں واقع شہر ریڈنگ میں پیش آیا۔ گریٹ ویسٹرن کمپنی کی اس ٹرین پر سینکڑوں افراد سوار تھے اور یہ پلیمتھ کی طرف جا رہی تھی۔ حادثہ اس وقت پیش آیا جب ٹرین پٹری سے گزرتی ایک گاڑی سے ٹرین کی ٹکر ہوئی اور اس کے نو ڈبے پٹری سے اتر گئے جبکہ کئی اپنی سائیڈوں پر الٹ گئے۔ ایمبولنس سروس کے مطابق ڈیڑھ سو افراد کو علاقے میں مختلف ہسپتالوں میں پہنچایا گیا ہے۔ رائل برکشائر ہسپتال کے ایک اہلکار کے مطابق ٹرین کے دس مسافروں کو شدید چوٹیں آئی ہیں جبکہ دو کی حالت نازک ہے۔ کئی مسافر گھنٹوں ٹرین کے ڈبوں میں پھنسے رہے۔ برطانیہ کے وقت کے مطابق اتوار کی صبح امدادی کاروائیاں دوبارہ شروع کی جائیں گی۔ اس معاملے کی تحقیقات کا حکم دے دیا گیا ہے۔ | 
یہ صفحہ دوست کو ای میل کیجیئے
پرِنٹ کریں
