عراقی شہر سمارا پر امریکی فوج نے بڑا حملہ کیا ہے

امریکی افواج، ایک ہزار عراقی فوجیوں کے ہمراہ علاقے کا کنٹرول حاصل کرنے کے لیے لڑ رہی ہیں۔

امریکی فوج کا کہنا ہے کہ اس نے تقریباً ایک سو نو عراقی مزاحمت کاروں کو ہلاک کردیا ہے۔ کئی شہری ہلاکتوں کی اطلاع بھی ہے۔

سمارا کے مقامی ہسپتال کا کہنا ہے کہ اتنی تعداد میں متاثرین لائے جارہے ہیں کہ اس کے پاس طبی سازو سامان کی کمی پیدا ہوگئی ہے۔ ہسپتال کے حکام کا کہنا ہے کہ ان کے پاس اب تک اسی ہلاک شدگان لائے گئے ہیں جبکہ سو سے زیادہ زخمی ہیں۔

ایک عراقی وزیر کا کہنا ہے کہ سینتیس مزاحمت کاروں کو فوجی کارروائی کے دوران گرفتار کیا جاچکا ہے۔

وزارت داخلہ کے ترجمان کے مطابق امریکی اور عراقی فوج کے ہاتھوں اسی فیصد علاقے کا کنٹرول آچکا ہے۔

علاقے میں پانی اور بجلی کے رابطے منقطع ہوچکے ہیں۔

اب تک صرف ایک امریکی فوجی کے ہلاک ہونے کی اطلاع ہے۔

امریکی فوج کے ترجمان کے مطابق اس نے عراقی فوج کے ہمراہ سمارا پر حملہ کیا اور شہر کی اہم عمارتوں پر قبضہ کر لیا ہے۔

ہسپتال کے ذرائع کے مطابق اس حملے میں ابھی تک بیس لوگوں کے ہلاک ہونے کی اطلاع ہے۔

امریکی فوج کے مطابق سمارا میں اس کا مقابلہ دو ہزار کے قریب مزاحمت کاروں سے ہے جو عراق میں تشدد کی کارروائیوں میں ملوث ہیں۔

بی بی سی کے نامہ نگار کا کہنا ہے کہ انتخابات میں ابھی چار مہینے سے کم رہ گئے ہیں اس لیے عراقی حکومت کی کوشش ہے کہ مزاحمت کاروں کے قبضے سے ان کے کنٹرول والے علاقے واپس لے لیے جائیں۔

جمعرات کے روز بغداد میں یکے بعد دیگرے ہونے والی تین مختلف بم دھماکوں میں مزاحمت کاروں نے امریکی فوجی قافلے کو نشانہ بنایا ہے جس کے نتیجے میں درجنوں بچوں سمیت 41 افراد ہلاک اور 130 سے زیادہ زخمی ہوگئے ہیں۔

ہلاک ہونے والوں میں اکثر بچے ہیں جو بموں کے ٹکڑے یا دھماکہ خیز مواد کی زد میں آنے کے باعث مارے گئے۔ اطلاعات کے مطابق ہلاک ہونے والے بچوں کی تعداد 34 تک پہنچ گئی ہے۔

یہ دھماکے اس وقت ہوئے جب بغداد میں پانی کے ایک پلانٹ کا افتتاح ہو رہا تھا اور لوگ جن میں زیادہ تر بچے تھے اس تقریب کو دیکھنے کے لیے جمع تھے۔

جمعرات کو ہونے والے دھماکے عراق میں تشدد کی لہر کا تازہ ترین حصہ ہیں۔

ان دھماکوں سے محض چند گھنٹے پہلے بغداد کے مغرب میں ایک خود کش حملے میں دو عراقی پولیس اہلکار اور ایک امریکی فوجی ہلاک ہوگئے تھے جبکہ ایک امریکی فوجی اس وقت مارا گیا جب امریکی فوجی اڈے پر راکٹ داغا گیا۔