بریجٹ کینڈال ماسکو میں بی بی سی کے سفارت نامہ نگار

روس کے صدر ولادمیر پوتن

’لیکن حکومت محض آنسوؤں اور حوصلہ افزا بیانات سے کام نہیں چلا سکتی۔۔۔ ہم بظاہر دہشت کے خلاف کوئی عملی نتائج حاصل نہیں کر پائے۔ ہم دہشتگردی کی جڑ کا خاتمہ کرنے میں ناکام رہے ہیں۔‘

ولادمیر پوتن نے یہ بیان گورنروں اور درجنوں صوبوں اور جمہوریاؤں کے رہنماؤں کے ایک ہنگامی اجلاس میں دیا اور کہا کہ ماسکو کی طرف سے سخت اقدامات ہی ایسے عناصر کا قلع قمع کر سکتے ہیں جو ملک کو توڑنا چاہتے ہیں۔

ہنگامی اجلاس کے دوران لوگ توجہ اور سنجیدگی سے صدر پوتن کی تقریر سنتے رہے جس دوران صدر نے سیکیورٹی اور سیاسی اصلاحات سے متعلق تجاویز بھی پیش کیں۔

اگر روسی پارلیمان ان تجاویز کی منظور دے دیتی ہے تو یہ اجلاس میں آئے ہوئے رہنماؤں پر بھی اثر انداز ہوں گی اور یہ بھی ممکن ہے کہ تمام لیڈر دوبارہ براہ راست منتخب ہو جائیں۔

بیسلان میں ہلاک ہونے والوں کو گزشتہ ہفتے دفنایا گیا

ولادمیر پوتن نےکہا کہ کابینہ کے وزراء کی طرح دیگر اعلیٰ حکام کو بھی سربراہ مملکت کی طرف سے نامزد کیے جانے کے بعد ان کی منظوری مقامی سطح پر بھی ضروری ہو گی۔

صدر پوتن کی اس تجویز پر عمل کیے جانے کی صورت میں کریملن کا روس کی مقامی سیاست پر رسوخ ڈرامائی طور سے بڑھ جائے گا۔

یہ بالکل ایسے ہی ہے کہ اگر صدر بش یہ اعلان کر دیں کہ امریکی ریاستوں کے گورنروں کا انتخاب عوام نہیں بلکہ وہ خود کریں گے۔ ایسی صورت حال میں آپ خود سوچ سکتے ہیں کہ امریکہ میں کیا ہنگامہ برپا ہو سکتا ہے۔

لیکن روس امریکہ نہیں ہے اور صدر پوتن اقتدار میں آنے کے بعد سے ہی نیچے سے اوپر کی طرف طاقت کی زنجیر کو مضبوط بنا کر ملک کو طاقتور بنانے کی بات کرتے رہے ہیں۔ ان کا یہ موقف ان کی صدارت کی اہم بات رہی ہے۔

صدر پوتن کے خیال میں سابق روسی صدر یلستن کے دور میں مختلف علاقوں کو بہت زیادہ خود مختاری دی گئی جس کے باعث ملک میں افراتفری اور لاقانونیت جیسے رجحانات میں اضافہ ہونے سے ملک کی اقتصادی صورت حال کمزور ہو گئی۔

روسی شہریوں پر حملے کیے جاتے رہے ہیں

روس میں لبرل نظریات کے حامل عناصر کو خدشہ ہے کہ ملک آزادیِ اظہار اور کثیر النسلی معاشرے سے دور ہوتا جا رہا ہے اور ایسی حالت میں صدر پوتن کی نئی تجاویز بھی اسی جانب اشارہ کرتی ہیں کہ روسی صدر جمہوریت کی بجائے حکومتی کنٹرول کو زیادہ اہمیت دے رہے ہیں۔

تاہم یہ تجاویز قانونی شکل اختیار کرتی ہیں یا نہیں اس کے لیے ابھی بہت سے مراحل طےکرنا باقی ہیں البتہ اہم ترین سوال یہ ہے کہ کیا نئی تجاویز دہشتگردی کو ختم کرنے میں مددگار ثابت ہوں گی یا نہیں؟

ایسے وقت میں کہ جب دہشتگردی کی روک تھام بیشتر روسیوں کی اولین ترجیح ہے، روسی صدر پر دباؤ ہے کہ وہ وسیع تر بنیادوں پر سوچیں اور ریڈیکل اقدامات کریں۔

صدر پوتن سے غیرمتفق لوگوں کے خیال میں حکومت میں اعلیٰ اہلکاروں کو زیادہ سیاسی کنٹرول ملنے سے ممکن ہے کہ روس کا نظم و نسق سنبھالنا دشوار ہو جائے۔ ایسی صورت میں روس میں افسر شاہی اور بدعنوانی بڑھ جائے گی اور ملک مضبوط ہونے کے بجائے کمزور ہو جائے گا۔