حملے میں پانچ افراد ہلاک ہوئے ہیں

اس حملے میں پانچ افراد ہلاک ہو ئے تاہم حماس کے رہنما بچ گئے ہیں۔ مقامی ڈاکٹروں کا کہناہے کہ احمد الجباری دھماکے میں صرف زخمی ہوئے ہیں۔

ہسپتال میں فلسطینی ذرائع کے مطابق حملے میں ہلاک ہونے والے افراد میں حماس کے کارکن بھی شامل تھے۔ خیال ہے کہ احمد الجباری کے کئی قریبی رشتہ دار بھی ہلاک شدگان میں شامل تھے تاہم اس بات کی ابھی تصدیق نہیں ہوئی ہے۔

ابھی یہ واضح نہیں ہو سکا ہے کہ یہ حملہ کس طرح کیا گیا ۔ احمد الجباری کے ایک پڑوسی نے رائٹرز خبر رساں ایجنسی کو بتایا کہ ’ہم نے ایک زوردار دھماکے کی آواز سنی تھی اور جب ہم بھاگ کر باہر نکلے تو دیکھا کہ ان کے گھر پر آگ لگی تھی۔‘

کچھ مقامی لوگوں کا خیال ہے کہ الجباری کے گھر پر راکٹ داغا گیا تھا جبکہ کچھ کا کہنا ہے کہ یہ دھماکہ ایک زمینی بم کو چلانے سے کیا گیا۔

اسرائیل نے اس سال ایسے کئی قاتلانہ حملے کیے ہیں جس میں حماس کے رہنماؤوں کو نشانہ بنایا گیا۔ مارچ میں حماس کے شیخ یاسین کو اسی طرح سے ہلاک کیا گیا اور ان کی ہلاکت کے ایک ماہ بعد عبدالعزیز رنتیسی کو بھی نشانہ بنا کر مارا گیا۔