ایران عراق جنگ میں تقریباً دس لاکھ لوگ مارے گئے

ایرانی وزارت خارجہ کے ترجمان حامد رضا آصفی نے کہا ہے کہ یہ فہرست سابق صدر صدام حسین کے خلاف مقدمے کی سماعت کرنے والی عراقی عدالت میں پیش کی جائے گی۔

ایرانی ترجمان نے کہا ہے کہ ان الزامات میں ایران کے خلاف جنگ کا آغاز کرنا بھی شامل ہے جس کے سبب دونوں ملک آٹھ برس تک برسرِپیکار رہے اور اس دوران کیمیائی ہتھیار بھی استعمال کیے گئے۔

ترجمان کا کہنا ہے کہ ایران اس بات کا جواب چاہتا ہے کہ جمعرات کو صدام حسین کی عدالت میں پیشی کے موقع پر پڑھ کر سنائے جانے والے الزامات کی فہرست میں ایران کے خلاف مبینہ جرائم کے ارتکاب سے متعلق الزامات کیوں شامل نہیں کیے گئے۔

ایران اور عراق کی جنگ میں تقریباً دس لاکھ لوگ مارے گئے تھے۔ اس کے علاوہ ایران نے اب بھی جنگ میں زہریلی گیس کے استعمال سے معذور ہونے والے ہزاروں افراد کا بوجھ اٹھا رکھا ہے۔

تاہم عدالت میں صدام حسین کے خلاف پڑھ کر سنائے جانے والے الزامات میں کرد شہریوں پر استعمال کی گئی زہریلی گیس اور کویت پر حملے کے الزامات شامل تھے۔