 |  جنوبی کوریا کا پروپیگنڈہ پوسٹر |
جنوبی اور شمالی کوریا نے اپنی سرحدوں پر ایک دوسرے کے خلاف لاؤڈ سپیکر کی مدد سے کیا جانے والا پروپیگنڈہ ختم کر دیا ہے۔ یہ پروپیگنڈہ انیس سو تریپن سے جاری تھا۔ یہ پیش رفت منگل کو نصف شب کے وقت دیکھنے میں آئی ہے۔ تاریخی سربراہ اجلاس کی چوتھی سالگرہ کے موقع پر کیا جانے والا یہ اقدام پہلے کبھی دیکھنے میں نہیں آیا اور یہ فریقین کی جانب سے باہمی تلخی کم کرنے کی کوششوں کا حصہ ہے۔ اس ضمن میں سرحدوں پر نصب لاؤڈسپیکر اور متعلقہ آلات اتار دیئے گئے ہیں۔ جنوبی کوریا کے صدر رو مو ہیون نے شمالی کوریا کو اقتصادی مدد کی پیشکش کی ہے تاکہ وہ اپنا ایٹمی منصوبہ ختم کر دے۔ انہوں نے کہا کہ ’اگر ایٹمی مسئلہ حل ہو جائے تو دونوں ممالک کے درمیان باہمی تعاون تیز تر ہو گا اور ہم اس ضمن میں جامع اور ٹھوس منصوبہ تیار کر رہے ہیں۔‘ جنوبی کوریا کے صدر نے صنعتی پیداوار میں اضافے اور ملکی ڈھانچہ تیار کرنے میں مدد کے علاوہ بین الاقوامی تنظیموں کے ساتھ شمولیت میں حمایت کرنے کی پیشکش بھی کی ہے۔ تاہم ایٹمی منصوبہ ترک کرنے کی بین الاقوامی اپیلوں کے باوجود شمالی کوریا اپنے موقف پر قائم ہے۔ شمالی کوریا کے سرکاری ذرائع ابلاغ نے جی ایٹ کے رکن ممالک کی جانب سے گزشتہ ہفتے دیئے گئے بیان پر تنقید کرتے ہوئے کہا ہے کہ جی ایٹ گروہ جوہری پابندیاں نافذ کر کے عراق کی طرح کا بحران پیدا کرنے کی کوشش کر رہا ہے۔ پیر کو جنوبی اور شمالی کوریا کی بحری افواج نے پہلی بار ایک دوسرے سے رابطہ قائم کیا اور کہا کہ وہ جارحانہ ارادے نہیں رکھتے۔ | 
یہ صفحہ دوست کو ای میل کیجیئے
پرِنٹ کریں
