طالبان کی جانب سے حملوں کی دھمکیاں

طالبان کمانڈر مُلا داداُللہ کے بقول اس طرح دنیا کو اندازہ ہو جائے گا کہ’ طالبان اب بھی پوری قوت کے ساتھ حملہ کرنے کی طاقت رکھتے ہیں‘۔

انہوں نے یہ بیان حامد کرزئی کی نو روز کی اس تقریر کے جواب میں دیا جس میں حامد کرذئی نے کہا تھا کہ ’طالبان اب کوئی خطرہ نہیں رہے‘۔

طالبان کی ایک اور دھمکی  ترجمان نے متنبہ کرتے ہوئے کہا کہ ’اگر ان کا مطالبہ پورا نہ ہوا تو وہ اغواً کئے گئے تُرک انجینیئر اور اس کے افغان ڈرائیور کو جان سے مار دیں گے‘۔ طالبان ترجمان

مُلا داداُللہ نے کہا کہ طالبان جنگجو افغانستان کے مذید صوبوں پر زبردست حملوں کی تیاریاں کر رہے ہیں تاکہ امریکی اور اسکے اتحادیوں کو ذیادہ سے ذیادہ نقصان پہنچایا جا سکے۔

پشاور میں بی بی سی کے نامہ نگار کو گمنام مقام سے سٹلائیٹ پر فون کرکے مُلا داداُللہ نے یہ بھی کہا کہ طالبان میں افغانستان کے کسی بھی مقام پر حملہ آور ہونے کی طاقت موجود ہے۔

دریں اثناً طالبان کے ترجمان عبدالطیف حکیمی نے کہا ہے کہ طالبان اغواً کئے گئے تُرک انجینیئر اور اس کے افغان ڈرائیور کو اس شرط پر رہا کرنے کے لئے تیار ہیں اگر اس کے بدلے ان دو طالبان جنگجوؤں کو چھوڑ دیا جائے جنہیں عدالت نے گذشتہ برس فرانسیسی امدادی رضاکاروں کے قتل میں ملوث ہونے پر سزائے موت سنائی تھی۔

ترجمان نے متنبہ کرتے ہوئے کہا کہ ’اگر ان کا مطالبہ پورا نہ ہوا تو وہ اغواً کئے گئے ترک انجینیئر اور اس کے افغان ڈرائیور کو جان سے مار دیں گے‘۔