عدنان عادل بی بی سی اردو ڈاٹ کام، لاہور

سارک ادیبوں کی کانفرنس کا دوسرا دن

اس کانفرنس کا آج دوسرا دن ہے جس میں مختلف ملکوں کے افسانہ نگارں اور شاعروں نے اپنی کہانیاں اور شاعری سنائی اور گیارہ ستمبر کے حملوں کے بعد ادب میں حقیقت پسندی کی نئی روش اور اس کے اثرات پر بات چیت کی۔

پسماندہ ممالک کے ساتھ معروف ناول لولیتا کے کردار جیسا سلوک کیا جارہا ہے اوران ملکوں کو ایسی ہی ترغیب دی جا رہی ہے کے وہ خود کو آج کے بڑے حکمرانوں کے مطابق ڈھال سکیں"۔ آصف فرخی

آصف فرخی نے کہا” پسماندہ ممالک کے ساتھ معروف ناول لولیتا کے کردار جیسا سلوک کیا جارہا ہے اوران ملکوں کو ایسی ہی ترغیب دی جا رہی ہے کے وہ خود کو آج کے بڑے حکمرانوں کے مطابق ڈھال سکیں"۔

انھوں نے کہا کہ ہمارے ادیبوں کو اس حقیقت کا سامنا کرنا ہوگا اور ہماری قوموں کو اس کے لیے مصیبت جھیلنا ہوگی کہ انھیں کسی اور کے خوابوں کے مطابق شکل بدلنے پر مجبور نہ کیا جاۓ۔

انھوں نے کہا کہ امریکہ میں گیارہ ستمبر کے واقعات نے ہماری صورتحال کو اور زیادہ گھمبیر بنادیا ہے۔ اب ہمارے سامنے سوال یہ ہے کہ یا تو ہم پڑھتے رہیں اور اس حلقہ کوتوڑیں اور حقیقت کا مقابلہ کریں یا پھر لولیتا جیسی بے بس عورت بن جائیں جسے لوگ اپنی غرض کے مطابق استعمال کرتے رہے۔

آصف فرخی نے کنیڈا میں رہنے والی فلم ساز پاکستانی زرقا نواز کی ڈائری کا بھی ذکر کیا جو کنیڈا کے اخباروں میں شائع ہوئی اور جس میں انھوں نے گیارہ ستمبر کے واقعات کے بعد مغرب کے بدلتے ہوۓ مزاج کے پس منظر میں اپنی روزمرہ کی زندگی کو بیان کیا ہے۔

نیپال سے آۓ ہوۓ پروفیسر ”ابھی سوبیدی" نے کہا کہ گیارہ ستمبر کے واقعات اور ان پر امریکہ کا ردعمل دونوں میں اتنی شدت ہے کہ یہ سیاست اور جنگ کے دائرے سے نکل کر مابعدالطبیعات کے دائرے میں چلے گۓ ہیں اور اسے القاعدہ اور امریکہ کے درمیان نیکی اور بدی کی جنگ کے طور پر پیش کیا جارہا ہے۔

اردو کے افسانہ نگار ”انور سجاد: نے کہا کہ عوام کا ایک بڑا دشمن میڈیا پر حکمران طبقے کا مکمل کنٹرول ہے اور سارک کے ادیبوں کو اس پر غور کرنے کے لیے ایک کمیٹی بنانی چاہیے"۔

آج سارک رائٹرز کانفرنس میں ”افتحار عارف اور شمیم حنفی" کے علاوہ بہت سے ادیبوں نے اپنی شاعری اور افسانے سامعین کے لیئے پڑھ کر سناۓ۔

یہ کانفرنس کل شام کو ختم ہو جاۓگی اور سوموار کو ادیب لاہور میں مشہور مقامات دیکھنے جائیں گے اور منگل کو اپنے اپنے ملکوں کو واپس چلے جائیں گے۔